Empoy Marquez, grade 2 palang rumaraket na, P10 bayad!

Ni Anne Venancio

Ibinahagi ng komedyante na si Empoy Marquez ang kanyang pinagdaanang hirap bago marating ang tagumpay sa industriya ng showbiz, sa panayam sa programang i-Listen kasama si Kara David.

Ayon kay Empoy, maaga siyang nagsimulang magtrabaho noong nasa elementarya pa lamang siya, kung saan naglilinis siya ng bahay ng kanyang tiyahin at binabayaran ng sampung piso kada araw. “Kung hindi ako magtrabaho, wala akong pantustos sa sarili ko,” aniya.

Ikinuwento rin niya ang pagkakahiwalay ng kanyang mga magulang na nagdulot ng matinding emosyon sa kanyang kabataan.

Habang nag-aaral, pinagsabay ni Empoy ang trabaho at klase na kadalasang nauuwi sa puyat at pagod. Dahil sa kakulangan sa pera, napilitan siyang huminto sa pag-aaral, na inilarawan niyang isa sa kanyang pinakamalaking pagsisisi.

Bago pumasok sa showbiz, dumaan siya sa panahong wala siyang malinaw na direksyon sa buhay at pansamantalang nakitira sa mga kaibigan. Doon siya nahikayat na sumubok sa auditions, na kalaunan ay naging daan ng kanyang pagpasok sa industriya.

Matapos ang ilang bigong subok, sa ikatlong pagkakataon ay nakapasok siya sa Mr. Swabe, na naging simula ng kanyang pag-angat sa showbiz hanggang sa makilala sa pelikulang Kita Kita.

Sa kabila ng tagumpay, naranasan din niya ang personal na pagluluksa, kabilang ang pagkawala ng kanyang lola habang siya ay nasa trabaho. Pinili niyang ituloy ang pagtatanghal bilang bahagi ng propesyonalismo.

Sa kasalukuyan, mas pinalalim niya ang kanyang pananaw sa buhay at higit na pinahahalagahan ang pananampalataya, layunin, at gabay ng Diyos sa kanyang paglalakbay.