62k batang Kankaloo nabigyan ng supplement at immunization kontra tigdas at polio

Halos 62,000 bata ang nakatanggap ng anti-polio, anti-measles, at bitamina A sa unang Linggo ng kampanya ng pagbabakuna ng ‘Chikiting Ligtas’.

May kabuuang 3,898 bata ang nakatanggap ng bitamina A, 26,181 ang nabakunahan laban sa tigdas, at 31,743 ang nakatanggap ng proteksyon laban sa polio.

Pinasalamatan ni Caloocan City Mayor Dale Gonzalo “Along” Malapitan ang mga residente sa kanilang pakikipagtulungan sa hangarin ng lokal na pamahalaan na protektahan at panatilihing ligtas sa mga sakit ang mga bata.

“Mahalagang naagapay natin ang mga magulang sa ating malawakang bakunahan laban sa rubella, polio, at tigdas,” pahayag ni Mayor Along.

Sinabi ng pinuno ng City Health Department na si Dr. Evelyn Cuevas na layunin ng pamahalaang lungsod na maabot ang lahat ng barangay sa pagsisikap nitong mabakunahan ang mga bata at maprotektahan sila mula sa polio at tigdas.

“Wala pong lunas ang mga karamdamang ito at tanging pagpapabakuna ang susi upang magkaroon ng proteksyon ang mga bata, kaya naman hindi natin alam na may sapat na kaalaman ang mga mamamayan at mapuntahan ang bawat barangay,” wika ni Dr. Cuevas.

Higit pa rito, hinihikayat ni Mayor Malapitan ang publiko, lalo na ang mga magulang at tagapag-alaga, na pabakunahan ang kanilang mga anak sa mga immunization sites na matatagpuan sa iba’t ibang health center o ng mga health worker na nagsasagawa ng house-to-house visit. Ang Chikiting Ligtas vaccination drive tatakbo hanggang Mayo 31, 2023.