AIRPORT TAXI DRIVER, NAGPAKITA NG ‘KATAPATAN’ SA CAAP-GENSAN AIRPORT

IPINAGMALAKI ni Civil Aviation Authority of the Philippines – General Santos International Airport (CAAP-GSIA) Manager Joel Gavina si G. Anselmo Dutaro Rodemio ang isang airport accredited taxi driver na nagsauli ng nawawalang wallet na naglalaman ng cash na nagkakahalaga ng Php 30,000 at mga bank card na pag-aari ng isang overseas Filipino worker (OFW).

Dumating si Robert Cutamora Laurel sa General Santos Airport sa pamamagitan ng Philippine Airlines flight PR 453 mula Maynila patungong GenSan noong Hulyo 10, 2023 bandang 11:30 AM at sumakay sa taxi na minamaneho ni Rodemio pauwi sa kanilang bahay.

Nang matuklasan ang pitaka, agad na nagmaneho si Rodemio pabalik kung saan niya dinala si Laurel upang ibalik ang mga nawawalang mahahalagang gamit.

Ipinahayag ni Laurel ang kanyang pasasalamat kay Rodemio at binigyan siya ng pera para sa kanyang pagpapakita ng katapatan. Ibinahagi ni General Santos Airport Manager Gavina na ang halaga ng katapatan ay talagang lumalabas sa mga manggagawa sa paliparan, kabilang ang mga accredited na airport taxi driver.

Sa courtesy visit nina Laurel at Rodemio sa opisina ng General Santos Airport Manager, muling nagpahayag ng pasasalamat ang una kay Rodemio, at binigyan siya ng isa pang cash reward.

Nakatakdang bigyan ng pagkilala ang matapat na airport taxi driver sa darating na flag raising ceremony ng CAAP – General Santos Airport sa Lunes. (JOJO SADIWA /JERRY TAN)