PBBM PINASASALAKAY ANG BODEGA NG SMUGGLERS/HOARDERS

IPINAG-UTOS ni Pangulong Ferdinand R. Marcos Jr. sa Bureau of Customs (BOC) na ipagpatuloy ang pagsalakay sa mga bodega upang sugpuin ang hoarders at mga iligal na importer ng bigas.

Sa press briefing sa Malacañang nitong Martes, sinabi ni BOC Commissioner Bienvenido Rubio na dinodoble ng BOC ang kanilang pagsisikap na tugisin ang mga ilegal na nag-aangkat ng mga produktong pang-agrikultura sa pamamagitan ng pag-validate sa lahat ng mga bodega, partikular sa mga inangkat na bigas.

Ayon kay Rubio, ayon sa direktiba ng Pangulo, “ang gagawin natin ay i-validate natin ang lahat ng warehouses na nag-iimbak ng imported na bigas at pagkatapos ng validation ay maglalabas tayo ng letters of authority para magsagawa ng inspeksyon sa mga warehouses na ito.”

Nagbigay din siya ng mga update sa mga pagsisikap ng ahensya, kungsaan inulit niya ang kamakailang sorpresang inspeksyon sa mga bodega ng bigas sa Bulacan.

Ang tatlong bodega na isinailalim sa inspeksyon ay ang Great Harvest Rice Mill Warehouse, na matatagpuan sa Intercity Industrial Complex; San Pedro Warehouse Intercity Industrial Complex; at, FS Rice Mill Warehouse.

Ang mga sako ng bigas ayon sa pagkakasunod ay natagpuan sa nasabing mga bodega ay inangkat mula sa Vietnam, Cambodia, at Thailand na may inisyal na tinatayang kabuuang halaga na 505 milyong piso, ayon kay Rubio.

Ang mga may-ari at operator ng nasabing mga bodega ay pinagbawalan na kunin ang mga kalakal maliban na lamang kung makapagpakita sila ng mga kinakailangang dokumento sa kanilang pag-aangkat ng bigas. Binigyan sila ng hanggang Setyembre 8, 2023 upang patunayan na binayaran nila ang mga kinakailangang tungkulin para sa mga kalakal.

Tiniyak ni Rubio na sasampahan ng kaso ang mga perpetrators, kung mapapatunayang may kasalanan ang mga may-ari at operator ng nasabing mga bodega.

Binanggit din niya ang patuloy na pakikipagtulungan ng BOC sa Department of Justice (DOJ) sa pagsasampa ng kaso laban sa mga smuggler na nahuli. (Vanz Fernandez)