Mayor Along binati ang 200 UCC grad na pumasa sa Licensure exam para sa guro

Mahigit 200 graduates mula sa University of Caloocan City – College of Education ang nagtagumpay na makapasa sa September 2023 Licensure Exam for Teachers (LET), na may kabuuang 45 pumasa para sa Elementary level at 161 para sa Secondary level.

Ang lahat ng unang kumukuha ng Elementary Level ay pumasa, habang ang halos 90 porsiyentong tagumpay ay nakamit ng Secondary level na unang kumukuha, na itinaas ang kabuuang antas ng pagpasa sa 84.91 porsiyento at 72.20 porsiyento, ayon sa pagkakabanggit, na mas mataas sa pambansang average para sa parehong pagsusulit.

Ipinahayag ni City Mayor Dale Gonzalo “Along” Malapitan ang kanyang pagmamalaki at paghanga sa mga bagong guro ng UCC at hinikayat silang tumulong sa pamahalaang lungsod sa patuloy na pagpapabuti ng kalidad ng edukasyon sa lungsod.

“Congratulations sa lahat ng mga bagong guro mula sa UCC! Patuloy lang ang suporta sa inyo ng pamahalaang lungsod sa propesyong inyong tatahakin. Kasama ang buong Caloocan, ipinagmamalaki ko kayong lahat,” wika ni Mayor Along.

“Ngayon kayo ay mga ganap nang guro, sana ay matulungan din ninyo ang mga kapwa niyo Batang Kankaloo. Tiwala ako sa inyong kakayahan na makatulong sa ating mga layunin para sa pag-aaral ng mga kabataan sa lungsod. Bukas po ang ating mga pampublikong paaralan para sa inyo,” pahayag ni Malapitan.(BR)