12-anyos ‘kidnapper’ ng 5-anyos pinatay

Nasawi ang 12-anyos na batang lalaki na isinasangkot sa pagkidnap sa 5-anyos na babae sa Cuadra Locsin St., Barangay 12, lungsod ng Bacolod, noong Sabado, Hulyo 13.

Sinabi ni Police Major Elmer Bonilla, pinuno ng Police Station 1, na nakatayo ang biktima, na umano’y may problema sa pag-iisip, sa isang kalye sa harap ng isang sikat na grocery nang lapitan ng isang lalaking sakay ng motorsiklo at binaril sa ulo.

Sinabi ni Bonilla na ayon sa mga magulang ng biktima, madalas na lumalabas ang kanilang anak sa kanilang bahay, sumasama sa grupo ng mga kabataan, at tambay sa bangketa.

Kabilang siya sa tatlong taong nakitang kasama ng babaeng paslit nang mailigtas ng mga awtoridad sa Barangay Villamonte dito noong Hulyo 1.

Sinampahan na ng kaso ang dalawang nasa hustong gulang na suspek sa pagdukot, ngunit hindi nagprosper ang kaso laban sa biktima, ayon kay Bonilla.

Nag-viral sa social media ang paghahanap sa nawawalang dalagita mula sa Talisay City, Negros Occidental, na humantong sa kanyang kinaroroonan.

Gayunpaman, sa kabila ng sinasabing link ng biktima sa kaso ng pagdukot, sinabi ni Bonilla na hindi nila makumpirma kung may kinalaman ito sa pagkamatay nito.

Narekober mula sa pinangyarihan ng krimen ang isang empty fired cartridge.

Patuloy na iniimbestigahan ng pulisya ang insidente. (Boy Celario)