P4.5-T nat’l budget sa 2021 lalagdaan ni Duterte sa Dec. 28

TINIYAK ng Malakanyang na pipirmahan na ni Pangulong Rodrigo Duterte ang 2021 General Appropriations Act (GAA) o ang P4.506 trillion national budget sa darating na Disyembre 28 sa Davao City.
Ayon kay Presidential Spokesman Harry Roque, dadalo ang limang kongresista at senador sa naturang ceremonial signing.
Dagdag pa ni Roque, natanggap ng Malacañang ang kopya ng 2021 budget noong Biyernes at bubusisiin itong maigi ng Pangulo upang alamin umano kung mayroong mga line item na dapat i-veto.
Popondohan ng 2021 budget ang healthcare system ng bansa, public and digital infrastructure at ang patuloy na pagtugon ng pamahalaan sa COVID-19 pandemic kasama ang pambili ng mga aangkating bakuna. (Vanz Fernandez)