Bugaw na sinaktan ni Pulong nagsalita: ‘2 ORAS AKO BINUGBOG’

SINABI ng nag-aakusa kay Davao City 1st District Rep. Paolo Duterte na ang ugat ng umano’y pag-atake ay dahil sa “triggered” ang mambabatas sa mga isyu sa pagbabayad sa mga babaeng kinuha niya sa isang inuman noong Pebrero 2025.

Sinabi ng negosyante na dalawang beses na na-trigger si Duterte noong gabi ng insidente: una ay noong ang isa sa kanyang mga bodyguard ay hindi kukuha ng upahang babae, at isa pa ay noong P1,000 lang ang binayaran ni Duterte sa isa sa mga upahang babae sa kabila ng mahabang panahon sa kanila.

“Dalawang beses siya na-trigger. ‘Yung una, ‘yung mga bodyguard niya binigyan niya ng babae tapos nagkulang ng isa. After that, nung bayad-bayad na lahat, parang ‘yung isang babae doon, 1k lang binigay [niya],” ayon dito sa isang panayam ng vlogger na si Niño Barzaga noong Sabado, Mayo 3, 2025.

“Ganito, 8 p.m. kami nag-start up to 3 a.m. Diba medyo mahaba ‘yung oras na nag-inuman kami pero binigay [sa babae] 1k lang. Doon biglang nag-react ‘yung babae na bakit 1k lang ‘yung binigay. Doon nag-start medyo nagalit siya sa akin at hindi doon sa babae,” ayon sa negosyante.
Nang makita rin aniya ni Duterte ang CCTV camera sa bar, ipinag-utos ng mambabatas na patayin ito.

“Buti na lang may CCTV pero nakita niya ‘yung CCTV eh kaya medyo naputol. Noong nasa baba na kami noong parang napansin niya na may CCTV, pina-off niya. After that, 2 hours niya ako binugbog eh,” ayon dito.

Idinagdag niya na hindi niya maaaring pekein ang insidente dahil hindi niya pag-aari ang bar kung saan nangyari ang umano’y pananakit.

Ang negosyante, na isang self-confessed bugaw, ay nagsabi rin na ito ang ika-apat na beses na “nag-utos” ng isang babae sa kanya ang mambabatas. Aniya, ginagawa lamang ito ni Duterte kapag kasama niya ang kanyang business partner o kasama ang kanyang mga kaibigang Chinese.
Nang tanungin kung bakit siya nagsampa ng reklamo sa Department of Justice at hindi sa Davao Police, sinabi niyang nangangamba siya sa kanyang kaligtasan sakaling magpadala siya ng reklamo sa isang tao na maaaring magbigay ng impormasyon sa mambabatas.

“Alam naman natin lahat na ‘yung Davao sakanila ‘yung ano… that time, hopeless ako e so sa DOJ na lang ako lumapit. Kasi kung sa Davao ako lumapit baka ma-mali ‘yung taong malapitan ko at baka ma-ano agad sa kaniya,” pahayag pa ng negosyante..

Aniya, bago ang insidente, wala siyang laban sa mga Duterte at gusto lang niyang humingi ng hustisya.

“Wala naman ako against sa kanila. I mean, pro-Duterte din ako. Wala akong against sa tatay niya, sa kapatid niyang babae. That time lang talaga na ginawa niya sa akin ‘yung pagbugbog na almost 2 hours,” ani pa nito.

Nagsampa lang din daw siya ng reklamo after 2 months dahil pinag-isipan niya ang nangyari sa kanya.

Nang hingan ng komento kaugnay ng kampo ni Duterte na hinahamon ang authenticity ng CCTV footage, sinabi ng negosyante na malinaw na si Duterte ang nasa video at hinamon ang iba na tingnan ang CCTV footage sa labas ng establisyimento.