Carlo Aguilar: May Hazard Pay ang mga Basurero at Kaagapay sa Kalinisan sa Aking Panunungkulan

Nangako si Las Piñas mayoral candidate at dating number one city councilor Carlo Aguilar na magkakaroon ng hazard pay ang mahigit 1,000 Kaagapay sa Kalinisan volunteers, basurero, at mga drayber na araw-araw nalalagay sa panganib sa kanilang trabaho.

Ayon kay Aguilar, matagal nang isyu ang mababang kompensasyon ng mga nagtatrabaho sa ilalim ng init ng araw, ulan, at maruming kapaligiran—lalo na’t wala rin silang sapat na proteksyon gaya ng personal protective equipment (PPE) o health insurance.

“Matagal nang dapat ibinibigay ang hazard pay. Hindi natin puwedeng ipagkait ang tamang suporta sa mga taong lumalaban para panatilihing malinis at ligtas ang ating siyudad,” pahayag ni Aguilar.

Sa kasalukuyan, tumatanggap ng ₱9,000 buwanang allowance ang mga Kaagapay sa Kalinisan, habang nasa ₱450 kada araw ang pasahod sa mga garbage collector at drayber—mga halagang malayo sa tunay na gastusin sa araw-araw.

Ipinunto ni Aguilar na sa ilang lungsod ay naipatupad na ang hazard pay para sa mga kawani ng gobyerno sa ilalim ng Republic Act 11466 (Salary Standardization Law), lalo na noong kasagsagan ng pandemya. Ngunit kadalasan, hindi napapabilang ang mga volunteer at job order personnel.

“Kami ni Vice Mayor Louie Bustamante ay magtutulungan para makahanap ng long-term na solusyon—hindi lang hazard pay kundi pati dagdag sahod at mas maayos na seguridad sa trabaho,” ani Aguilar.

Dagdag pa niya, balak din niyang isulong ang paglikha ng city ordinance at pag-realign ng budget para masiguro na tuloy-tuloy at patas ang matatanggap na benepisyo ng mga sanitation workers.

Pinasalamatan ni Aguilar ang walang sawang serbisyo ng mga Kaagapay sa Kalinisan at garbage collection teams, at iginiit na panahon na para sila’y kilalanin bilang frontliners ng kalinisan, hindi bilang pansamantalang manggagawa.

“Ang kalinisan ng Las Piñas ay dahil sa sakripisyo nila. Kaya nararapat lang na sila ay suportahan ng gobyerno—hindi lang sa salita, kundi sa gawa,” pagtatapos ni Aguilar.