Ilang respondents sa Dacera case dumalo sa preliminary investigation sa Makati court

MATAPOS mabigong magpakita sa National Bureau of Investigation (NBI) ang mga respondent sa pagkamatay ng flight attendant na si Christine Dacera para magbigay sana ng kanilang mga testimonya, ilan naman sa mga ito ay dumalo sa preliminary investigation ng korte sa Makati City.
Kabilang sa mga dumalo sa preliminary investigation ang manager ng hotel na si John Paul Halili na sinasabing kaibigan ni Dacera.
Maging ang mga respondent na sina JP dela Serna, Rommel Galido, Clark Rapinan at Gregorio de Guzman ay dumating sa pagdinig sa Office of the City Prosecutor ng Makati City. Ang humawak sa kaso ay si Makati Assistant City Prosecutor Joan Bolina-Santillan.
Una rito, nagdesisyon noon si Santillan na magkaroon ng preliminary investigation sa kaso dahil may mga isyu umanong kailangang maging klaro para malaman ang partisipasyon at culpability ng bawat respondent sa isyu ng rape at pagpatay kay Dacera.
Para naman sa tagapagsalita ng pamilya Dacera na si Atty. Brick Reyes, sinabi nitong naniniwala ang pamilya Dacera na mayroong cover-up sa mga akusado para mapagtakpan ang isinasagawang imbestigasyon
Iginigiit parin ng pamilya Dacera na minolestiya si Christine bago ito namatay. (Gaynor Bonilla)