Publiko hinimok na magtipid ng tubig dahil sa super El Niño

HINIMOK ng National Water Resources Board (NWRB) ang publiko na magtipid at maging maingat sa paggamit ng tubig bilang paghahanda sa posibleng epekto ng super El Niño.

Ayon kay NWRB Executive Director Dr. Sevillo David Jr., may mga contingency measure na ang pamahalaan ngunit kailangan ang pakikiisa ng publiko sa wastong paggamit, pagre-recycle at pagbabawas ng hindi kailangang konsumo ng tubig.

Pinayuhan din ang water concessionaires na tiyaking maayos ang kanilang pipelines upang maiwasan ang leakage at pag-aaksaya ng tubig.