JENNYLYN, NOON PA MAN HANDS-ON NA KAY JAZZ

Ni Beth Gelena

Dahil sa Patrick Garcia brouhaha hinggil kay Jennelyn Mercado at sa anak nilang si Alex Jazz, muling lumabas ang dating interbyu ng Queen of All Media Kris Aquino sa young mom noon na si Jennylyn na viral ngayon sa social media platforms.

Bago pa man makilala bilang isa sa mga hinahangaang aktres ng kanyang henerasyon si Jen, naranasan na niya ang isang papel na hindi niya maaaring bitawan—ang pagiging ina kay Alex Jazz.

Sa murang edad (21 lang siya noon), kinailangang harapin ang pagiging single mom ni Jennylyn habang patuloy na nagtatrabaho sa showbiz.

Hindi naging madali na pagsabayin ang pag-aalaga kay Jazz at ang sunod-sunod na trabaho, pero sa isang lumang panayam kay Kris sa Kris TV, malinaw kung gaano niya sinikap na manatiling present sa buhay ng kanyang anak.

At nang diretsahang tanungin ni Kris kung sino ang katuwang niya sa pagpapalaki kay Jazz, naging simple ngunit mabigat ang sagot ni Jennylyn:

Kris: “So you do it all by yourself?”

Jennylyn: “Ako lang talaga, Miss Kris. Mahirap, sobra.”

Dito nagsimulang lumitaw ang mas personal na kuwento ni Jennylyn—ang isang batang ina na kailangang magtrabaho, bumangon mula sa mahirap na pinagdaanan at sabay na tiyaking hindi nawawala ang kanyang presensya sa buhay ng kanyang anak.

Sa naturang interview noong 2015, diretsahang tinanong ni Kris si Jennylyn tungkol sa paghihiwalay nila ni Patrick noong buntis siya.

Kris: “Nag-break kayo diba nung buntis ka?”

Jennylyn: “Yes… Medyo ano, emotional ako nun at tsaka depressed ako talaga.”

Napag-usapan din nila kung gaano kabilis kinailangan ni Jennylyn na bumalik sa trabaho matapos niyang manganak kay Jazz sa pamamagitan ng cesarean section.

Kris: “How soon did you have to go back to work?”

Jennylyn: “Eight months. CS ako eh… Nagpahinga lang ako saglit, tapos balik na agad ako ng work.”

Ipinaliwanag din ni Jennylyn na nagkaroon siya ng problema sa kanyang surgical wound habang nagpapagaling.

Jennylyn: “‘Yung sugat ko, kasi bumukas pa siya eh after mga four months, nag-pop out yung [sugat]…”

Isa sa pinakamahalagang bahagi ng kanilang usapan ay nang tanungin ni Kris kung sino ang tumutulong kay Jennylyn sa pagpapalaki kay Jazz.

Kris: “Who helps you in raising Jazz? Kasi you’re alone, wala kang kapatid… May pinsan ba na close?”

Jennylyn: “Wala rin.”

Muling nilinaw ni Kris kung siya lamang talaga ang pangunahing nag-aalaga sa kanyang anak.

Kris: “So you do it all by yourself?”

Jennylyn: “Ako lang talaga, Miss Kris. Mahirap, sobra.”

Ikinuwento rin ni Jennylyn kung gaano kabigat ang kanyang schedule noon bilang aktres at ina. May mga panahong halos wala na siyang oras para makauwi sa bahay.

Jennylyn: “Kasi sa totoo lang Miss Kris, halos hindi na talaga ako nakakauwi. Uuwi ako para maligo, tapos alis ulit ako.”

Dahil dito, sinikap niyang maisama si Jazz kapag may trabaho siyang maaaring dalhin ang anak.

Jennylyn: “Sinasama ko lang siya sa mga live shows ko, tapos pag may mga out of town ako, sinasama ko na rin para lang makasama ko siya.”

Sa puntong ito, nagbigay naman si Kris ng pananaw tungkol sa pagiging magulang at sa pagtanggap ng mga oportunidad sa trabaho.

Kris: “It doesn’t make you a bad parent if you grab all these opportunities, kasi sine-secure mo lang yung kinabukasan.”

Mahalaga rin sa kanilang pag-uusap ang desisyon ni Jennylyn na payagan si Jazz na maging ring bearer sa kasal ni Patrick kay Nikka Martinez.

Jennylyn: “Kinausap ako ng wife niya, nagpaalam sila kung puwedeng kunin na ring bearer si Jazz. Sabi ko, sige, tapos pinasukatan ko na ng suit.”

Nang tanungin naman kung bakit hindi siya dumalo sa kasal, simple ang naging sagot ni Jennylyn:

Jennylyn: “Ayoko naman [pumunta] kasi moment nila ‘yun.”

Sa kabila ng kanyang matagumpay na career, malinaw sa mga naging sagot ni Jennylyn noon na malaking bahagi ng kanyang pagsisikap ay ang pagiging ina kay Jazz.

Sa panayam kay Kris, hindi lamang ang pinagdaanan niya bilang single mom ang lumutang kundi kung paano niya sinikap na manatiling present sa buhay ng kanyang anak habang patuloy na nagtatrabaho.

Napakahalaga ng sinabi ni Kris tungkol sa pagiging ina ni Jennylyn.

Sa halip na husgahan ang pagiging abala ng aktres, sinabi niya: “It doesn’t make you a bad parent if you grab all these opportunities, kasi sine-secure mo lang yung kinabukasan.”

Sa bagay na ito, mulat sapul nang ipanganak ni Jen si Jazz ay tanging siya lamang ang naging hands on sa pagpapalaki sa anak.

Ang interview ni Kris sa Kapuso aktres ang magsisilbing mga “resibo” ng pinagdaanan niya—hindi para manira ng kahit sino, kundi para ipakita kung gaano kabigat ang responsibilidad na kinaya niya noon.