Uhuging tuta na lamang ba ang ilang MSM?

Ngayon lamang sa panahong ito na ang mainstream media (MSM) ay hindi nahihiya na ipakita ang busal sa kanilang bibig.

Kahit ano pang kabulastugan, kahihiyan, kabulukan at kataksilan sa bayan ng ilang mga tao sa gobyerno, tikom na tikom ang bibig, mulat na mulat ang mga mata, pero walang nakikita, at hindi naman bingi, pero ,mandin ay walang naririnig na reklamo, daing at hinagpis ng taumbayan.

Watchdog ang tawag sa media, ibig sabihin, bantay ng bayan laban sa kabulukan at katrayduran ng mga taong gobyerno.

Pero ngayon, kung may pangil man ang media, tinanggal na at animo ay maamong tuta na konting himas lamang sa batok, konting dog food lamang, napakatahimik na ng MSM.

Sising alipin, mandin ay batang uhugin ang ilang MSM at ito ngayon ay isang malaking kahihiyan pero hindi gayon ang inaasta nila: ay kaytapang laban sa kritiko ng mga nakaposisyon sa gobyerno at tutang iyakin sa pagsunod sa kumpas ng kung anoman ang nais na ipagawa sa kanila.

Sayang, nakahihiya na tawagin pang 4th estate ang media, lalo na ilang ang MSM.

Sa demokrasya, unang estado ang Executive branch, Ikalawa, ang Legislature at Ikatlo ang Judiciary, at ang media, ang ikaapat na estado ng bayan.

Mahalaga ang papel ng media sa ikabubuti ng demokrasya pagkat ito ay nagiging sandidan ng taumabayan laban sa abuso, pagsasamantala ng Una, Ikalawa at Ikatlong estado.

Kumbaga, ito ang nagsisilbing pampigil o hadlang sa pagmamalabis, sabi nga, sa sistemang demokrkatiko, ito ang tagasuri – taga-check; at taga-balanse sa anomang tagilid na kalagayan ng di-pantay na pagpapairal ng batas.

Media ang naglalantad ng kabulukan at nagpapahayag ng karapadapat na purihin at Gawain tumutugon sa kagalingan ng bayan.

Ang media ay maitutulad sa isang instrumentong napakatalas: tulad ng scalpel ng isang surgeon, ginagamit upang maalis ang tumor o kanser na magpapagaling sa maysakit.

At tabak na tatagpas sa ulo ng mga suwail.

Sa panahon ng malupit na pananakop ng Espanya, ang media o ang propaganda movement nina Dr. Jose Rizal, Marcelo del Pilar, Lopez Jaena, at iba pang propagandista ang tumulong sa pagsisindi ng mitsa ng Liwanag upang mag-alsa ang bayan.

Noong panahon ng martial law, ang mainstream media (MSM) ay kasingbagsik sa pag-uusig laban sa karahasan at kabulukuan ng Estado, at napakalaki ng papel ng media sa pagbagsak ng rehimeng batas militar ng dating Pangulong Ferdinand Marcos Sr.

Kaya nga sa lahat ng Konstitusyong binalangkas at pinagtibay ng taumabayan, likas na karapatang tao ang kaalayaan sa pamamahayag, pagpapahayag at maging ang Kalayaan sa pagtitipon sa matahimik na paraan.

Freedom of the Press and Freedom of Expression ay mahalagang probisyon sa 1935 Constitution at ng sumunod pang Saligang Batas at ng 1987 Constitution.

Bunga ng kalayaang ito, bumagsak ang Martial Law ni Macoy, at ang press freedom ay ang Karapatan ng mamamayan laban sa mga taksil at kalaban ng demokrasya.

Takot sa katotohanang dala ng press freedom ang mga suwail, mga taksil at mga mandaramong sa yaman ng taumbayan; Kalayaan sa pagpapahayag ang taga-bandila ng katotohanan at tabak ng mamamayan laban sa katiwalian.

Pinapatay ng tabak ng katotohanang dala ng Kalayaan sa pamamahayag ang kabuktutan ng mga tao sa kapangyarihan.

Katotohanan ang matinding tagasupil ng kasinungalingan at ang pag-abuso sa kapangyarhan na ipinahihiram lamang ng taumbayan sa nasa pamahalaan.

Noon iyon, pero ngayon, pipi, bulag at bingi ang ilang MSM at walang imik sa maraming eskandalo at kabulukan ng mga tao sa kapangyarihan.

Marami nang eskandalo ang nangyari sa pamahalaan na hindi binubuklat at ibinubulatlat sa bayan ng MSM, kasi nga may busal sa bibig, may piring ang mga mata at may pasak sa tainga.

At ang busal ay may katumbas na limpak na salapi.

Napakarami ng eskandalo ang nangyari at ang mga ito ay bumulaga sa atin, pero ang ilang MSM, nakatutulig ang katahimikan.

Paborito na nga raw kantahin ngayon ng mga utaw ang kantang ”The Sound of Silence”, hehehehehe.

May tanong: Ang 4th Estate ba natin ay kasali na rin ba sa sirkulo ng mga korap at tiwali?

Teka, hindi naman siguro, baka may pinoproteksiyonan lamang.

Pero sa pagpoporotekta sa sarili nilang interes, katulong sila, kasapakat at kasabwat sa pagtatakip sa katotohanang dapat na mailantad sa buong taumbayan.

Nakalulungkod, ang bantay ng bayan laban sa katiwalian ay hindi na gayon ngayon.

Ito na dating bulldog sa tapang, ngayon ay uhuging tuta na lamang ng ilang suwail, tiwali at korap sa gobyerno.

Uhuging tuta na nga lang ba ang ilang MSM?
***
Para sa inyong mga suhestyon, reaksyon at opinyon ay sumulat o magmensahe sa bampurisima@yahoo.com.