‘Optional use’ ng face mask ng mga estudyante sa open spaces pinayagan na ng DepEd

PINAPAHINTULUTAN na ng Department of Education (DepEd) ang opsyonal na pagsusuot ng face mask ng mga estudyante sa mga open spaces.

Sinabi ni DepEd Spokesperson Michael Poa, batay sa panuntunan na ibina-baba ng DepEd sa mga paaralan ay tatalima na rin sila sa kautusan ni Pangulong Ferdinand “Bongbong” Marcos Jr. na boluntaryo na lamang ang pagsusuot ng face mask sa mga hindi mataong lugar.

Klinaro naman ni Poa na kailangang hindi matao at may maayos na bentilasyon ang open spaces at obligado pa rin naman ang pagsusuot ng face mask sa loob ng mga silid-aralan.

Samantala, tiniyak naman ng DepEd na may tulong na nakalaan para sa mga gurong magpopositibo sa COVID-19.

Excused o makakatanggap din ng paid leave ang mga guro na kailangang mag-isolate dahil may sintomas ng virus at may close contact exposure. (Josephine Patricio)