Community pantry sa Maynila ‘di dapat pakialaman ng MPD

INATASAN ni Manila Mayor Isko Moreno ang Manila Police District na huwag pakialaman ang mga nagsusulputang community pantry sa Maynila.
Ayon kay Mayor Isko, hindi dapat gambalain ang community pantry dahil malaking tulong ito sa pamahalaan habang hinaharap ang pandemya sa COVID-19.
Una rito, sinabi ng organizer ng community pantry sa Pandacan, Maynila na ititigil na nila ang operasyon sa pangambang maiugnay sa makakaliwang grupo.
Ayon kay Mayor Isko, maaring magbukas ulit ang Pandacan community pantry at suportado ito ng lokal na pamahalaan.
Sinabi pa ni Mayor Isko na maaring bumisita sa city hall ang mga organizer ng community pantry kung nakararanas ng problema.
Nakaka-proud aniya ang mga taga-Maynila dahil lumalaganap sa lungsod ang pagmamalasakit sa kapwa. (Jocelyn Domenden)