Pagtalakay ng Senado sa pagpapabuti ng nursing education, ikinagalak ni Bong Go

IKINAGALAK ni Senator Bong Go ang pagtugon o pagtalakay ng Senate Committee on Civil Service sa panukala niyang pagpapabuti ng nursing education sa bansa.

Sa isang talumpati noong Huwebes, inihayag ni Go ang kanyang taos-pusong pasasalamat sa komite sa naging hakbang sa kanyang Senate Bill No. 395, kilala rin bilang “Advanced Nursing Education Act of 2019”.

Ang panukalang batas ay naglalayong pahusayin ang propesyon ng narsing sa pamamagitan ng pagtatatag ng mga hakbang na magreresulta sa kaugnay na edukasyon sa pag-aalaga, makataong kondisyon sa pagtatrabaho, at mas magandang prospect sa karera para sa mga Pilipinong nars.

“Napakaimportante po ng measure na ito para mas lalong paigtingin ang nursing education program sa ating bansa,” sabi ni Go.

Binanggit niya na ang mga Pilipinong nars, dahil sa kanilang kakayahan at likas na mapagmalasakit, ay hinahangad kahit sa ibang mga bansa, kaya malaki ang kontribusyon nito sa ekonomiya ng Pilipinas.

“Kilala po ang mga Filipino nurses dahil sa likas na kakayahan, kalinga, at malasakit na ipinapakita ng mga Pilipino sa kapwa tao. Sa totoo lang po, halos lahat po ng pamilya ay may contribution – at least, may nurse talaga sa pamilya. Even ako, halos sa pamilya natin – pinsan, kapatid – mayroon talagang nurse,” ayon kay Go.

Inulit ni Go ang pangangailangan para sa isang mas standardized at advanced na nursing education program na magtatatag ng matibay na pundasyon para sa mga nars sa bansa upang sila ay maging mas mahusay at makakuha ng mas magandang pagkakataon sa karera.

“Bagama’t hinahanap-hanap ng mga dayuhan ang magagandang katangian ng ating Filipino nurses, yung nursing education program po natin ay maaari pang ma-improve dahil naka-focus lang ito sa ‘bare minimum’ o pag-produce ng graduates na agarang ipadadala sa abroad o isasabak sa iba pang lokal na ospital,” ani Go.

Sa ngayon ani Go, walang oportunidad ang Filipino nurses para palawakin ang kanilang kakayahan at kaalaman upang maging dalubhasa sa kanilang napiling propesyon.

Ang iminungkahing panukala ni Go ay mangangailangan ng pagtatatag ng standard basic at graduate programs para sa nursing education na itatag sa Commission on Higher Education accredited institution.

Sa ilalim ng pangunahing programa, ang mga mag-aaral ay aatasan na sumailalim sa community integration at immersion para hikayatin silang magtrabaho sa iba’t ibang komunidad.

Samantala, ang isang programang nagtapos ay bubuo sa mga karanasan at kasanayan ng mga nars tungo sa mastery, kadalubhasaan at pamumuno sa pagsasanay, pananaliksik at edukasyon.

Ang ratio ng faculty-to-student ay alinsunod sa mga pamantayang tutukuyin ng CHED.

Ang mga naghahangad na nars ay kailangang pumasa sa isang National Nursing Admission Test upang matiyak ang kalidad ng mga mag-aaral na nakapasok sa programa.

Idinagdag niya na ang panukala ay makikinabang din sa buong sistema ng pangangalagang pangkalusugan.

Kung mas maraming nars sa mga ospital, sinabi ni Go na ang mga pasyente ay makahihinga nang maluwag dahil alam na sila ay binibigyan ng pinakamahusay na pangangalagang medikal.