Papel ng sekyu sa peace and order, pinuri ni Bong Go

Pinuri ni Senator Christopher “Bong” Go ang pagsasabatas sa Private Security Services Industry Act of 2022 na magpapalakas sa regulasyon ng nasabing industriya sa bansa.

Si Go ang co-sponsor ng nasabing panukala, na naging Republic Act No. 11917 noong Hulyo 30. Pinawalang-bisa ng bagong batas ang RA No. 5487.

Sa ilalim ng batas, ang industriya ng private security services ay dapat palakasin upang matiyak na ang kahusayan ng mga pribadong sekyu at propesyonal ay akma sa pagpapatupad ng batas ng bansa sa pangangalaga ng kaayusan ng publiko.

“Alam naman natin kung gaano kahalaga ang ginagampanan ng mga security guards bilang frontliners. Katulad po ng mga pulis at militar, malaki rin ang kontribusyon sa peace and order kahit na sa maliliit na komunidad,” ayon kay Go.

Para matiyak ang mataas na kalidad ng mga Filipino security guards, ang batas ay nag-uutos sa lahat ng private security agencies (PSA) na 100 porsiyentong pagmamay-ari at kontrolado ng isang mamamayang Pilipino. Ang mga PSA ay dapat ding magkaroon ng maximum na 2,000 security personnel.

Higit pa rito, pinapadali nito ang proseso para sa mga gustong mag-aplay para sa trabahong security personnel. Ang mga aplikante ay dapat nasa legal na edad, physically at mentally fit, na may magandang moralidad at hindi dapat nahatulan ng anumang krimen.

Nilalayon din ng batas na pahusayin ang kakayahan ng mga Pilipinong security guard sa pamamagitan ng pagbibigay ng mga kinakailangang programa sa pagsasanay at edukasyon, kabilang ang mga pangunahing kurso sa security guard, mga espesyal na kurso sa security guard, pagsasanay sa mga opisyal ng seguridad, pagsasanay sa tiktik, at mga kursong ahente sa proteksyon ng kandidato.

“Hindi po natin dapat minamaliit ang trabaho ng isang security guard. Sila po ang dahilan kung bakit ligtas ang ating mga establisyemento dahil sila rin po ay nagbubuwis ng kanilang buhay para sa ating mga kababayan,” idiniin ni Go.

“Kung maaalala natin yung nangyari sa Ateneo shooting incident na may nadamay na security guard, huwag na po natin hayaan na mangyari yun. Kaya naman malaki ang aking tiwala na mas marami pang PSA at security personnel ang makikinabang sa pagtatatag ng batas na ito,” dagdag niya.

Alinsunod naman sa kanyang pangako na protektahan ang kapakanan at interes ng mga unipormadong tauhan ng bansa, inihain ni Go ang Senate Bill No. 422 na magbibigay ng libreng legal na tulong sa sinumang opisyal o enlisted personnel ng Armed Forces of the Philippines o Philippine National Police, na nahaharap sa anumang kaso na nagmumula sa isang insidente na may kaugnayan sa pagganap ng opisyal na tungkulin.

“Palaging nasa frontline natin ang ating mga pulis at mga sundalo sa kampanya ng pamahalaan upang masiguro na ligtas ang ating mga mamamayan mula sa banta ng mga kriminal, lalo na ang mga sindikato ng droga at mga terorista,” ayon kay Go.

“Sa pagbibigay natin ng libreng legal assistance, malaking tulong na po ito sa ating mga sundalo at mga pulis na patuloy na nagsasakripisyo ng kanilang buhay para maprotektahan lang ang ating mga mamamayan,” dugtong niya.