‘Poblacion girl’ pinagmulta ng P20K sa pagtakas sa mandatory quarantine

‘GUILTY’ ang naging ‘plea’ ng tinaguriang “Poblacion girl” na si Gwyneth Anne Chua sa korte sa pagtakas niya sa mandatory quarantine rule na ikinasa sa kasagsagan ng COVID-19 noong Disyembre 2021.

Sa desisyon, sinabi ni Makati Prosecutor Rafael Rodrigo Esguerra na pinagmulta si Chua ng P20,000.

Nauna nang nagsampa ng kaso ang Philippine National Police Criminal Investigation and Detection Group laban kay Chua, sa kanyang mga magulang at anim na iba pang tao kabilang ang mga staff ng Berjaya Hotel dahil sa paglabag sa public health law noong holidays.

Naniniwala kasi ang mga awtoridad na nahawaan ni Chua ang humigit-kumulang 15 katao nang laktawan ang paghihiwalay sa panahon ng bakasyon.

Matatandaang dinala si Chua sa quarantine facility sa Berjaya Hotel sa Makati, at naka-check-in doon noong Disyembre 22, 11:23 ng gabi.

Bandang 11:40 ng gabi noong araw ding iyon, sinundo si Chua sa hotel ng kanyang ama sakay ng isang SUV.

Sumunod, kinumpirma ng mga imbestigador ang presensya ni Chua sa isang Makati restaurant gabi ng Disyembre 23, sa pamamagitan ng CCTV footage at witness accounts.

Sinabi ng CIDG na noong Disyembre 25, 9:00 ng gabi, bumalik si Chua sa hotel na tinulungan ng kanyang ina.

Bilang isang balikbayan, “obligado si Chua na sundin ang health protocol na nakataas noon na ipinapatupad ng IATF at DOH,” giit ng pulisya.