Motorsiklo sinalpok ng truck: Magkaibigan nasawi

NASAWI ang magkaibigang sakay ng motorsiklo nang bumangga at pumailalim sa kasalubong na truck sa Batangas City.

Kinilala ang mga nasawi na sina Paolo Miguel Aquino Serapin, 20 anyos, driver ng motorsiklo; at angkas na si John Paul Noche, 27, kapwa residente ng nasabing lungsod at magka-trabaho.

Ayon sa pulisya, napunta ang motorsiklo sa linya ng kasalubong na truck kaya nangyari ang salpukan sa bahagi ng Barangay San Isidro.

Inihayag ng kaanak ni Serapin na nakatakda sana itong magdiwang ng kaarawan.

Nakikipag-uganay na ang driver ng truck sa pamilya ng mga namatay sa aksidente.