Pinay drug mule kumanta: African drug syndicate labas-masok sa Pinas

ISINIWALAT ng isang Pinay drug mule ang paraan ng pagre-recruit at galawan bilang galamay ng West African Drug Syndicate (WADS).

Pag-amin ni “Violet”, hindi niya tunay na pangalan, ilang beses niyang nagawang makalabas-pasok at malusutan ang security sa Ninoy Aquino International Airport (NAIA) nang hindi nade-detect na may lamang shabu ang maleta na ibinigay sa kanya ng sindikato.

“Huling biyahe ko nitong October. Bumiyahe ako galing Malaysia papuntang Terminal 3. Dala ko ‘yung maleta na may lamang shabu nang hindi na-detect ng machine at ng sniffing dogs,” paglalahad ni alyas Violet.

Ayon pa sa 45-anyos na ginang, sa kanyang mga biyahe bilang drug mule, inilagay umano ng sindikato ang iligal na droga sa gilid at false bottom ng hard suitcase na nakabalot din.

Bilang patunay, ipinakita niya ang kanyang passport na may tatak ng pag-alis niya noong October 14 at bumalik siya nitong October 27.

Aniya, tila isang normal na pasahero lamang siya nang kunin niya ang kanyang maleta sa conveyor at lumabas sa airport.

Dagdag pa niya, sa mga unang taon ng kanyang pagiging taga-deliver ng droga, nagawa niyang makapasok sa local airport nang hindi na-detect ang dala niyang iligal na droga.

“Noong time na ‘yun sa Terminal 3, hindi po (nakita sa X-ray), kahit nga sa sniffing dogs hindi na-detect ng aso,” sabi pa ni Violet na bumiyahe umano noon sa Malaysia na aniya’y kinokonsidera nila bilang base ng sindikato.

Dagdag pa niya, matapos makalabas sa airport habang dala ang iligal na droga, nag-check in siya sa malapit na hotel nang bigyan ng instruction na dalhin ang kontrabando sa Zamboanga City.

Isa pa umanong drug mule ang lumapit sa kanya para ibigay naman ang tiket at perang panggastos. Sa sumunod na araw, dumaan siya muli sa proseso sa airport tulad ng pag-check in ng bagahe bago lumipad patungo sa kanyang destinasyon.

Paglapag sa Zamboanga, kinuha lang aniya ang maleta saka inabot sa isang African national bago muling lumipad pabalik ng Maynila.

Dahil sa madalas niyang pagbiyahe bilang drug mule, lumakas ang loob ni Violet para ipagpatuloy ang pagde-deliver ng droga para sa WADS, sa loob ng Pilipinas at sa iba’t ibang bansa sa Asya, Africa, at maging sa Europe.

Ibinahagi ni Violet na sa kanyang bawat biyahe ay kumikita siya ng US$1,500 dagdag pa ang panggastos. “Ngayon ang minimum $3,000 plus expenses,” sabi niya.

Sinabi pa ni Violet na wala rito sa Pilipinas na mga alagad ng batas o airport personnel ang nakipagsabwatan sa sindikato kundi sa ibang bansa na kanyang napuntahan partikular sa isang bansa sa Africa kungsaan ineskortan pa siya ng isang pulis doon.

Ang pulis umanong ito ang nag-check mismo ng kanyang maleta na may lamang droga at siniguro na walang sisita sa kanya hanggang makaalis ang kanyang eroplano.

Bagama’t lagi siyang bumibiyahe mag-isa, ibinahagi rin ni Violet na may ilang pagkakataon na may dalawa o tatlo silang nasa flight. Kahit hindi sila ipinakilala sa isa’t isa, nalalaman nalang nila na pareho ang kanilang misyon dahil sa destinasyon na kanilang pupuntahan.

Sabi pa ni Violet, kahit pa sa bawat biyahe niya buhay ang kapalit, walang pumilit sa kanya na maging drug courier, ang rason aniya ng WADS: laging may ibang Pinay ang gagawa din nito para sa pera.