2 senglot na parak nanggulo sa bar

Dalawang pulis na nakatalaga sa Quezon City Police District (QCPD) ang nahaharap sa posibleng pagkatanggal sa serbisyo dahil gumawa umano ang mga ito ng gulo sa loob ng isang bar noong Miyerkoles ng umaga.

Sinabi ni Police Maj. Gen. Anthony A. Aberin, direktor ng National Capital Region Police Office (NCRPO), na iniutos na niya ang paghahanda ng mga kasong kriminal at administratibo laban sa dalawang pulis.

“Sila ay nasa ilalim ng mahigpit na kustodiya. Sila ay nahaharap sa mga kriminal na kaso ng mga alarma at iskandalo at malisyosong kapilyuhan,” ayon kay Aberin.

Ayon sa QCPD, ang dalawang pulis, na nakatalaga sa Warrant Section ng Holy Spirit Police Station, na pumasok sa bar na matatagpuan sa kahabaan ng Commonwealth Avenue.

Lasing na umano noon ang dalawang pulis na may ranggong Patrolman at Corporal.

Umorder naman sila ng ilang bote ng beer at makalipas ang isang oras, nagsimula na silang maghagis ng ice cubes sa mga waiter at iba pang customer.

Sinabi ni Aberin na agad namang nakipag-ugnayan ang manager ng bar sa pulisya na nagresulta sa pagkakaaresto sa dalawang pulis.(Boy Celario/Almar Danguilan)