Hindi natutulog ang batas sa QC

Sa nagdaang isang linggo, muling pinatunayan ng Quezon City Police District (QCPD) sa ilalim ng pamumuno ni District Director, PBrig. Gen. Randy Glenn Silvio, na ang hustisya ay hindi lamang isang konsepto at sa halip isa itong aktibong pagkilos.

Heto nga, sa nakalipas na pitong araw, sa patuloy na pagpapatupad ng bawat operational units at police stations sa direktiba ni Silvio kaugnay sa patuloy na kampanya laban sa kriminalidad – nandyan iyong mga most wanted na matagal nang nagtatago sa batas at iba pang kaso, bukod sa mga nagtutulak ng droga, umabot sa 190 indibidwal ang nadakip sa magkakahiwalay na police operation.

Patunay lamang din ito na hindi kayang paglaruan ng mga masasamang loob ang batas…at patunay din ito na hindi natutulog ang batas sa QC.

Kabilang sa pinakahang-hanga ay ang walang kupas na pagtugis sa wanted persons kung saan akala ng mga ito ay “ligtas” na sila dahil sa haba ng panahon nilang pagtatago.

Pero nagkamali itong naarestong si alyas “Jimmy” sa inakalang kinalimutan na siya – makaraang ang 16-taong pagtatago sa batas, bumagsak siya sa kamay ng QCPD. Maging sina “Virgilio,” “Denver,” “Judith,” at “Allan”, na mahigit isang dekada na ang nakalipas simula nang gumawa ng labag sa batas.

Sa resulta ng operasyong ito, ipinapakita lamang ng QCPD na hindi kumukupas ang kanilang memorya o ang batas ay laging gising.

Malinaw din ang mensaheng hatid ng matagumpay na operasyon. Maaari kang magtago, pero hindi ka pwedeng habambuhay na tumakas. Kaya sa mga biktima na nawalan na ng pag-asa matapos ang 13 o 15 taon, ang mga arestong ito ay nagpapatunay na ang gulong ng hustisya ay umiikot pa rin, gaano man ito katagal.

Layunin din ng kampanya ng QCPD ay para sa isang ligtas na komunidad para sa seguridad ng QCitizens.

Hindi lamang mga “wanted persons” ang target ng QCPD kung hindi nakapokus din sa gera laban sa ilegal na droga. Sa loob ng isang linggo ay napigilan ng pulisya ang pagpakat sa kalsada ng P900,000 halaga ng droga. Ibig sabihin, maraming buhay din ang nailigtas dito.

Maging sa mga nakumpiskang ilegal na baril – bawat baril na nakumpiska ay katumbas ng mga buhay na nailigtas mula sa krimen.

Bakit ba nagtatagumpay ang QCPD? Una’y dahil sa leadership ni Silvio at buong suporta ng kanyang mga opisyal at tauhan at siyempre dahil din ito sa kombinasyon ng teknolohiya (QC Helpline 122 at E911) at dedikasyon. Ang bawat pulis sa Station 1 hanggang 16 ay hindi lamang basta nagpapatrolya – sila ay nakikinig sa boses ng publiko.

Patunay din na ang terminong “swift and responsive” ni PBGen. Silvio ay hindi lamang palamuti at sa halip ay ramdam na ramdam ng bawat QCitizen na nakakauwi nang ligtas sa gabi.