PBBM ININSPEKSYON ANG BACLARAN CHANNEL, 640 TONELADANG BASURA ANG NAKUHA SA LUGAR

Ininspeksyon ni Pangulong Ferdinand Marcos Jr. noong Miyerkules, Agosto 12, ang Baclaran-Redemtorist Water Channel sa Parañaque City habang ang mga ahensya ng gobyerno ay nagpatuloy sa malawakang clean-up operation na nagtatanggal sa humigit-kumulang 640 metrikong tonelada ng basura sa loob lamang ng dalawang araw.

Bumisita si Marcos sa site upang suriin ang kondisyon ng daluyan ng tubig at ang patuloy na paglilinis habang tinutugunan ng mga awtoridad ang basura na humarang sa channel.

Nakiisa rin sa inspeksyon si Department of Public Works and Highways (DPWH) Secretary Vince Dizon, na inilarawan ang sitwasyon bilang isang “seryosong krisis sa basura” habang pinaigting ng ahensya ang pagtugon nito

Ang paglilinis ay isinasagawa ng DPWH at Metropolitan Manila Development Authority (MMDA), katuwang ang Parañaque City government at iba pang local government units.

Sinabi ni Mayor Edwin Olivarez na ang tone-toneladang tambak ng basura sa Baclaran-Redemtorist channel ay hindi pa nangyari sa lungsod.

Sinabi ni Dizon na ang karamihan sa mga basura ay maaaring nagmula sa ibang lugar.

Sa ikalawang araw ng operasyon, 72 trak ang naghakot ng 1,189 cubic meters — o humigit-kumulang 396 metric tons — ng basura mula sa channel.

Kasunod ito ng unang araw na paghakot ng 732 cubic meters, o humigit-kumulang 244 metric tons, na nakolekta ng 45 na trak.

Sa kabuuan, ang dalawang araw na operasyon ay nagtanggal ng 1,921 cubic meters ng basura at debris, katumbas ng humigit-kumulang 640 metric tons, gamit ang 117 truckloads.

Nagbabala si Olivarez na ang obstruction ay nagpapataas ng panganib sa pagbaha, lalo na sa panahon ng malakas na pag-ulan at high tide.

Sinabi ng mga awtoridad na magpapatuloy ang paglilinis hanggang sa sapat na malinis ang channel at maibalik ang kapasidad ng tubig-baha nito. (RONALD BULA)