P1.5-B YAMAN NI SARA SANDATA NG PROSEKUSYONSA PAGPAPATALSIK SA VP!

SINABI ni House prosecutor Terry L. Ridon ng Bicol Saro Party-list nitong Miyerkules na ang napakalaking halaga ng umano’y hindi maipaliwanag o hindi idineklarang yaman ni Vice President Sara Z. Duterte ang naging dahilan upang magdesisyon ang prosecution team na talikuran ang tatlo sa apat na Articles of Impeachment at magtuon na lamang sa isa.

Ipinaliwanag ni Ridon na ang naging batayan ng mga miyembro ng prosecution team sa pagtutok sa Article II o ang paratang na nagkamal ang bise presidente ng hindi maipaliwanag na yaman ay ang mga natuklasan ni financial forensic analyst Atty. Alexander Cabrera hinggil sa aktuwal na mga ari-arian at net worth ni Duterte.

“Ang pinagbatayan noon ay ang paglalahad ng kabuuang unexplained wealth ng pangalawang pangulo sa testimonya ni Atty. Alexander Cabrera, kung saan binanggit niya ang mahigit P800 milyon – P817 milyon, sa eksaktong halaga, na tinatayang konserbatibong halaga ng hindi maipaliwanag na yaman ng pangalawang pangulo,” ayon kay Ridon.

Kung gagamitin naman ang pinakamaluwag na kalkulasyon ni Cabrera, sinabi ni Ridon na maaaring umabot sa humigit-kumulang P1.5 bilyon ang tinatayang hindi maipaliwanag o hindi idineklarang net worth ng bise presidente.

“Dahil dito, nang talakayin ng mga prosecutor ang mga numerong ito, sinabi namin na dito na tayo magtuon. Ito ang ebidensiyang kailangan upang patunayan ang Article of Impeachment tungkol sa unexplained wealth,” ani Ridon.

“Gaya ng lagi naming sinasabi, mananalo man o matatalo kami ay ibabatay sa usapin ng hindi maipaliwanag na yaman. Kumbinsido kami na ito talaga ang magiging batayan ng pagpapasya ng ating mga senator-judge sa huli,” dagdag niya.

Sinabi naman ni Manila City Rep. Joel Chua, miyembro rin ng House prosecution team, na hindi dapat pagdudahan ang sinseridad ng prosekusyon sa layuning panagutin ang bise presidente sa mga umano’y paglabag nito sa Konstitusyon na nakapaloob sa apat na Articles of Impeachment.

Ipinaliwanag ni Chua na sa mga kasong impeachment, sapat nang makakuha ng kinakailangang boto ang prosekusyon sa kahit isang Article of Impeachment upang mahatulan ang respondent.

“Hindi naman kinakailangang mahatulan ang bise presidente sa lahat ng apat na artikulo. Isa lamang ang kinakailangan. Kaya kami nakapagpasya nang ganito ay dahil nakita namin na ang huling isinumite naming ebidensiya tungkol sa unexplained wealth ang mas mauunawaan at mas madaling maipaliwanag sa ating mga kababayan,” ani Chua.

Ayon kay Chua, isinaalang-alang din ng prosekusyon ang kagustuhan ng lahat ng panig, kabilang ang publiko, na magkaroon ng maagang pagtatapos ang impeachment proceedings.

“Nakita rin namin na kung hahayaan pa naming maiharap ang lahat ng ebidensiya, lalo lamang itong tatagal,” aniya.

Sinabi rin ni Chua na hindi na inaasahan ng prosekusyon na magbibigay pa ng sagot ang bise presidente sa mga paratang laban sa kanya, dahil tumanggi umano itong magpaliwanag mula pa noong 2004, nang isagawa ng Kamara de Representantes ang mga paunang imbestigasyon.

Samantala, sinabi ni House prosecution adviser at tagapagsalita Ace Barbers na dalawang taon nang nagpapatuloy ang pagsisikap na panagutin ang bise presidente at hindi humihina ang kanilang mga hakbang, batay sa dami ng mga testigo at ebidensiyang iniharap sa impeachment trial.

“Hindi naman tayo aabot sa ganito kung hindi tayo seryoso. Mahigit dalawang taon na natin itong ginagawa at ganoon na rin katagal nating sinasabi na dapat magkaroon ng pananagutan sa mga paratang na ito,” ani Barbers.

Ayon kay Barbers, pinaghandaan nang husto ng prosekusyon sa nakalipas na dalawang taon ang impeachment trial.

“Kung ang pag-uusapan ay sinseridad sa layuning panagutin siya, malinaw ito sa dami ng mga testigong iniharap namin at sa lahat ng dokumentaryong ebidensiyang isinumite namin sa korte. Sa palagay ko, hindi na matatawaran ang sinseridad ng prosecution team at ng ating mga prosecutor sa kanilang layuning panagutin siya, na kalaunan ay maaaring humantong sa pagtanggal niya sa puwesto at pagpapataw ng mga kaukulang parusa,” dagdag ni Barbers.