MULING NAGTAMBAL ANG I HEART PH AT HKTB PARA SA SEASON 11

Ni Archie Liao

Muling hatid ng I Heart PH at Hong Kong Tourism Board (HKTB) ang saya at pakikipagsapalaran sa Season 11, tampok ang Hong Kong bilang lungsod na pinagsasama ang kultura, kasaysayan, pagkamalikhain, at modernong pamumuhay.

Itinampok ang mga bagong destinasyon sa media launch ng I Heart PH sa Winford Resort Manila noong Oktubre 15, 2026.

Ayon kay Ms. Chian Jia Liew, Regional Director for Southeast Asia ng HKTB, ikinatutuwa nilang muling makasama ang programa upang ipakilala sa mga Pilipino ang mga natatanging karanasan sa Hong Kong.

Sa pamamagitan ng partnership, inaasahang mas mahihikayat ang mga Pilipinong turista na tuklasin ang mga bagong pasyalan at mga tagong yaman ng lungsod.

MGA KLASIKONG KAGANDAHAN AT BAGONG TUKLAS

Tampok sa I Heart PH ang limang destinasyong nag-aalok ng kultura, libangan, at masasarap na pagkain.

Hong Kong Palace Museum — Tampok dito ang mga pambihirang koleksiyon ng artifact, porselana, at likhang-sining na nagpapakita ng kasaysayan at kultura ng China.

Madame Tussauds Hong Kong — Maaaring magpa-selfie ang mga bisita kasama ang mga makatotohanang wax figure ng mga kilalang personalidad. Kabilang sa mga Pilipinong tampok dito sina Manny Pacquiao, Pia Wurtzbach, Catriona Gray, Anne Curtis, at Kathryn Bernardo.

Ma Wan 1868 — Pinagsasama ng makasaysayang fishing village ang pamana ng nakaraan, mga malikhaing espasyo, lokal na kainan, at magagandang tanawin. Binuksan ito sa publiko noong Marso 2025.

Ding Ding Foodie Tour — Sakay ng iconic na double-decker tram, matutuklasan ng mga turista ang lokal na pagkain, kasaysayan, at mga tanyag na lugar sa Hong Kong sa tulong ng tour guide.

Hong Kong Disneyland — Hatid nito ang masayang pakikipagsapalaran para sa buong pamilya sa pamamagitan ng mga atraksyon, themed lands, palabas, at paboritong karakter ng Disney. Magsisimula naman ang mga aktibidad para sa Pasko sa Nobyembre 20.

SA LIKOD NG MGA TATAK AT NATATANGING KARANASAN

Itinatampok din ng I Heart PH ang mga negosyong nagpapakita ng pagkamalikhain at natatanging kultura ng Hong Kong.

Kabilang dito ang Bakehouse, isang kilalang artisanal bakery na pinagsasama ang tradisyonal at modernong paraan ng paggawa ng tinapay; Kingston Engraving, na nagpapanatili ng tradisyon ng hand-carved stamps; at TeemTonefai, na kilala sa artisanal ice cream at gelato.

Tampok din ang Goods of Desire (G.O.D), na nagbebenta ng mga produktong hango sa lokal na kultura at disenyo ng Hong Kong.

Samantala, ipinakikilala ng Dara, isang Filipino restaurant sa Hong Kong, ang pagkaing Pinoy at nagbibigay ng lugar na nagsisilbing tahanan at tagpuan ng mga Pilipinong naninirahan doon.

Ayon kay Jermaine Bunoan, co-founder at pinuno ng operasyon ng Dara, nakaugat ang kanilang konsepto sa simple at pamilyar na lasa ng lutong-bahay na pagkaing Pilipino.

Mula sa mga tagong pasyalan hanggang sa mga natatanging produkto at atraksyon, ipinakikita ng Hong Kong na higit pa ito sa isang destinasyon—isa itong lugar na puno ng bagong karanasan at inspirasyon.

ANG IBA’T IBANG MUKHA NG OLD TOWN CENTRAL

Pinagsasama ng Old Town Central ang kasaysayan at makabagong kultura sa pamamagitan ng mga makasaysayang lansangan, tradisyonal na tindahan, at tanyag na kainan sa paligid ng Central Mid-Levels Escalator.

Kabilang sa mga dapat bisitahin ang Luk Yu Tea House, na kilala sa tradisyonal na Cantonese dim sum at tsaa; Central Market, na ngayon ay sentro ng mga tindahan, café, at malikhaing espasyo; at Hollywood Road, na tampok ang makukulay na street art.

Maaari ring mamili sa PMQ, isang makasaysayang gusali na naging sentro ng disenyo, fashion, at sining, at tumuklas ng tradisyonal na paggawa ng toyo sa Kowloon Soy.

Para sa mga naghahanap ng kakaibang karanasan, tampok din ang Bar De Luxe, na kilala sa eleganteng Japanese-style bartending, at Yi-ming Cheongsam Boutique, na nagtatampok ng tradisyonal na kasuotang Chinese na cheongsam o qipao.

Sa mga destinasyong ito, masisilayan ang iba’t ibang mukha ng Hong Kong—mula sa tradisyonal na pagkain at makasaysayang pook hanggang sa sining, disenyo, at makabagong nightlife.

Sa pangunguna ni Valerie Tan, patuloy na naghahatid ang I Heart PH ng mga tampok tungkol sa fashion, beauty, lifestyle, at travel mula sa Pilipinas at iba pang panig ng mundo, na may natatanging pananaw ng mga Pilipino.

Produced by TV8 Media Productions, magbabalik ang I Heart PH para sa bagong season sa Oktubre 25, Linggo, ganap na 11:30 ng umaga sa GTV.