TAGUIG LGU PINURI ANG SUNOD-SUNOD NA MATAGUMPAY NA ANTI-CRIMINALITY NG PULISYA

PINURI ni Taguig City Mayor Lani Cayetano ang Taguig City Police Station (TCPS) para sa isang serye ng matagumpay na anti-criminality at law enforcement operations nitong Oktubre na humantong sa pag-aresto sa mga high-value target, pagkakahuli sa No. 2 Most Wanted Person ng NCRPO, at pagkagambala sa aktibidad ng ilegal na droga sa ilang barangay.

Kinilala ni Mayor Lani ang pamumuno ni PCOL Byron F. Allatog, pinuno ng Taguig City Police Station, para sa mabilis na koordinasyon at pare-parehong aksyon ng koponan sa pagpapanatili ng kaligtasan ng publiko sa buong lungsod.

Ipinagmalaki din ni Cayetano ang mga kalalakihan at kababaihan ng Taguig City Police para sa kanilang katapangan at walang sawang pagsisikap sa pagtataguyod ng kapayapaan at kaayusan.

Sa buong Oktubre, isinagawa ng Taguig Police ang mga sumusunod na pangunahing operasyon:

– Paghuli sa Top 2 Most Wanted Person ng NCRPO. Noong Oktubre 7, inaresto ng pulisya si Jomar Salik y Radzak, 21, na tinaguriang Top 2 Most Wanted Person (Regional Level) para sa pagpatay, sa isang anti-criminality operation sa Barangay Upper Bicutan.

Nasamsam naman sa Pembo ang P3.8 Million Shabu, sa isang high-value drug personality na si Rowel Mendoza, 26, sa isang buy-bust operation noong Oktubre 1, Bukod dito, nakumpiska ang P1.15 Million Shabu sa Upper Bicutan kung saan noong Oktubre 8, ay nahuli ng mga operatiba si James Jason Bagaforo, 35, sa isang rooftop buy-bust operation.

Isang Bisita, ang nahuli sa pagpuslit ng Droga sa Kulungan — Sa pakikipag-ugnayan sa Bureau of Jail Management and Penology, nahuli ng pulisya ang isang babaeng bisita na nagtangkang magpuslit ng P95,200 halaga ng shabu sa Manila City Jail Annex sa Camp Bagong Diwa noong Oktubre 12.

Isang Motorcycle Hold-up Scam Suspect ang inaresto ng mga pulis na pinaniniwalaang nasa likod ng serye ng hold-up scam na target ang mga sakay ng motorcycle taxi sa Taguig at mga kalapit na lungsod.

Ang patuloy na pagpapatrolya ay humantong din sa pagkakaaresto kay alyas “DCS,” 34, street level individual sa Barangay North Daang Hari, na may nakuhang P59,160 halaga ng shabu.

Sinabi ni Mayor Lani na ang mga resultang ito ay nagpapakita ng kahalagahan ng koordinasyon sa pagitan ng lokal na pamahalaan at pulisya sa pagtugon sa krimen at pagpapalakas ng proteksyon sa komunidad. (JOJO SADIWA)