Mga panukala para sa Geriatric Care at Lupus, umusad… Makabuluhang Reporma sa Kalusugan, itinutulak ni Senador Camille Villar; Inaprubahan ng Senado ang mga Panukalang Batas sa Huling Pagbasa

Bilang patibay sa pangako ng Estado sa preventive healthcare at pantay na akses sa mahahalagang serbisyong pangkalusugan, inaprubahan ng Senado noong Lunes sa ikatlo at huling pagbasa ang dalawang mahahalagang panukalang batas sa kalusugan kung saan si Senadora Camille Villar ay kabilang sa mga pangunahing may-akda at co-author.

“Ang preventive care at maagap na interbensyon ay nakababawas ng paghihirap, nagpapababa ng pangmatagalang gastusin, at nagliligtas ng buhay. Tinitiyak ng mga panukalang ito na ang dekalidad na serbisyong pangkalusugan ay hindi isang pribilehiyo kundi isang karapatan—na dapat maabot ng bawat Pilipino, anuman ang edad o kondisyon,” pahayag ni Sen. Villar, ang pinakabatang senador ng Ika-20 Kongreso.

Binibigyang-diin ng pagpasa ng mga panukalang ito ang kahalagahan ng isang mas maagap at inklusibong sistema ng kalusugan. Isa sa mga inaprubahan ay ang Senate Bill No. 1509 o ang “Philippine Geriatric Center Act,” na naglalayong itatag ang Philippine Geriatric Center (PGC) bilang isang tertiary specialty hospital sa ilalim ng Department of Health (DOH). Kabilang si Senadora Villar sa mga may-akda ng panukalang batas na ito na naglalayong isabatas ang isang komprehensibo, integrado, at napapanatiling sistema ng geriatric care para sa mga senior citizen at tumatandang populasyon—lalo na ang mahihirap, mga indigent, at mga may malulubha at komplikadong karamdaman.

Ang itatatag na Philippine Geriatric Center ay magbibigay ng espesyalisadong serbisyong medikal, diagnostic, rehabilitative, wellness, long-term, at palliative care na angkop sa pangangailangan ng mga nakatatanda. Magsisilbi rin itong pambansang sentro para sa pananaliksik sa geriatric care, pagsasanay ng mga health professional, at pagbuo ng pamantayan para sa age-friendly at people-centered na mga pasilidad pangkalusugan, na ganap na nakapaloob sa balangkas ng Universal Health Care.

Inaprubahan rin sa ikatlo at huling pagbasa ang “Comprehensive Lupus Prevention Act,” isang panukalang batas na co-author si Senadora Villar, na naglalayong magtatag ng isang pambansang programa sa kalusugan laban sa Systemic Lupus Erythematosus (SLE). Inaatasan ng panukala ang DOH na magsagawa ng isang komprehensibo at pambansang programa para sa pag-iwas, maagang pagtuklas, paggamot, at rehabilitasyon ng lupus, kasabay ng pagpapalawak ng kaalaman ng publiko at pangangalaga sa karapatan at kapakanan ng mga may lupus.

Sa ilalim ng panukala, itatatag ang Center for Lupus and Autoimmune Diseases bilang pambansang teknikal at referral center para sa SLE at iba pang autoimmune diseases. Nakapaloob din sa batas ang mandatory training para sa mga healthcare provider, paglikha ng information at monitoring system para sa mga kaso ng lupus, pagsasama ng early detection at screening sa mga benepisyo ng PhilHealth, at ang taunang pagdiriwang ng National Lupus Awareness Week tuwing unang linggo ng Mayo. (CESAR MORALES)