ISKO PINANGUNAHAN ANG DIGITAL MEDIA ASIA 2026

Binigyan ng mainit na pagtanggap ni Manila City Mayor Francisco “Isko” Moreno Domagoso ang daan-daang news media executives at publishers mula sa buong Asia Pacific at iba’t-ibang panig ng mundo nitong Martes ng umaga, Abril 28, habang unang beses na naging host ang kabisera ng Pilipinas ng Digital Media Asia conference sa loob ng 18 taon nitong kasaysayan.

Ang nasabing kaganapan, na inorganisa ng World Association of News Publishers at ginanap sa The Manila Hotel, na dinaluhan ng mga nangungunang publisher, editor, at digital executives upang talakayin ang mga trend sa digital, kita, at teknolohiya sa industriya ng balita.

Sa kanyang talumpati, kinilala ni Domagoso sina WAN-IFRA Director Lee Kah Whye, Philippine Daily Inquirer chairman Sandy Prieto, at Manila Bulletin na si Dr. Emilio Yap III sa pagdala ng ika-18 edisyon ng kumperensya sa Maynila.

“Ito ang kauna-unahang pagkakataon na ang Digital Media Asia, na nasa ika-18 taon na, ay ginaganap sa Pilipinas, at lubos kaming ipinagmamalaki ito,” ani ng alkalde.

Ikinumpara rin ni Domagoso ang katangian ng Maynila sa tibay ng industriya ng media, na aniya ay patuloy na “bumabangon, nagtatayo muli, at sumusulong” sa kabila ng paulit-ulit na pagsubok.

Sinabi rin niya sa mga mamamahayag at media executives na dumalo na iginagalang ng pamahalaan ang papel ng press sa demokrasya, at nananatiling mahalaga ang kanilang trabaho sa kabila ng lumiit na newsroom at patuloy na pagbabago sa industriya.

“Mahalaga ang trabahong iyan. Noon pa man ay mahalaga na ito, at ang administrasyong ito—anumang pagkakaiba natin—ay iginagalang ang papel ninyo sa ating demokrasya,” aniya.

Binanggit din ng alkalde ang mga digital governance initiatives ng Maynila—kabilang ang mga executive order para sa open governance at digital public service—bilang patunay na kailangang nakabatay sa tiwala ng publiko ang teknolohiya upang maging epektibo.

“Ang teknolohiya ay kasinghusay lamang ng tiwalang nakapaloob dito,” dagdag niya, sabay tanong: “Paano natin mapananatili ang pagiging karapat-dapat sa tiwala ng publiko?” (BP)