Advertisers
Pinuri ni Central Singapore District Mayor Denise Phua ang programang pabahay ni Manila City Mayor Francisco “Isko” Moreno Domagoso, partikular ang pagpapatayo ng mga gusaling pabahay sa loob mismo ng lungsod, na tinawag niyang isang makabago at malayong pananaw na programa.
Tinawag din ni Phua si Domagoso na isang mahusay na developer dahil sa malikhaing paraan nito sa pagtugon sa problema ng pabahay sa Maynila.
“Napakaganda ng iyong pananaw,” pahayag ni Phua kay Domagoso sa kanilang bilateral meeting sa LaVie Resort Hotel nitong Martes, Nobyembre 17, bago ang pagsasagawa ng ASEAN Governors and Mayors Forum (AGMF).
Kinatawan ni Phua ang limang district mayor ng Singapore sa naturang pagpupulong. Sinabi niyang nasubaybayan niya ang programang Minimum Basic Needs ni Domagoso na nakatuon sa pabahay, edukasyon, serbisyong pangkalusugan at trabaho.
“Sinabi sa akin ang tungkol sa inyong direksiyon pagdating sa pagtugon sa mga pangunahing pangangailangan ng mamamayan. Tama ang inyong mga prayoridad. Malinaw kong nakikita ito sa inyong mga programa sa pabahay, edukasyon, kalusugan at paglikha ng trabaho,” ani Phua.
Ipinaliwanag naman ni Domagoso na ang mga pangalan ng mga proyektong pabahay ng lungsod, gaya ng Tondominium, ay nagmula sa kanyang sariling karanasan noong bata pa siya at naninirahan sa isang komunidad ng mga informal settler.
Aniya, noong dekada 80, pabirong tinatawag na “condominium” ang magkakapatong na barung-barong sa kanilang komunidad.
namin ang mga pagsubok na pinagdaanan namin upang makalikha ng magandang solusyon,” paliwanag ng alkalde.
Dagdag pa ni Domagoso, ₱2,000 hanggang ₱3,000 lamang kada buwan ang binabayaran ng mga benepisyaryo ng pabahay. Maaari rin nilang ipamana sa kanilang mga tagapagmana ang unit ngunit hindi nila ito maaaring ipagbili upang maiwasan ang muling pagbebenta ng mga ipinagkaloob na bahay.
“Ang Maynila ang naging pinakamalaking developer at may-ari ng mga ari-arian! Mas lumaki ang yaman ng lungsod sa usapin ng mga asset habang natutugunan natin ang matagal nang suliranin sa paninirahan sa kalunsuran,” pahayag ni Domagoso.
Sinabi naman ni Phua na kabaligtaran ang kinakaharap na hamon ng Singapore dahil maaaring muling ipagbili ng mga residente ang kanilang mga pampublikong pabahay sa mataas na halaga.
Inilarawan pa niya ang kanilang bansa bilang “biktima ng sarili nitong tagumpay” dahil sa malaking kita na maaaring makuha sa muling pagbebenta ng mga unit.
“Napakaganda ng inyong estratehiya,” papuri ni Phua bago ang planong teknikal na pagbisita ng delegasyon ng Singapore sa mga proyektong pabahay ng Maynila.
Aniya, maaari ring matuto ang Singapore sa ibang pamamaraan ng Maynila sa pagpapatupad ng mga programang pabahay.(BP)