‘Online pautang’ silip ni Sen. Gatchalian

HINILING ni Senator Sherwin Gatchalian na magkaroon ng pagdinig sa Senado kaugnay sa talamak na pagsasamantala at pang-aabuso sa ‘online pautang’ gayundin ang ginagawang pagpapa-utang ng mga kompaniya na wala sa pangangasiwa ng Bangko Sentral ng Pilipinas (BSP) at Securities and Exchange Commission (SEC).

Ayon kay Gatchalian, pag-aaralan kung kakailanganin na magpasa ng batas para matakpan ang mga ‘butas’ sa ipinatutupad na policies at guidelines na ipinatutupad ng mga kinauukulang ahensiya.

“Dahil sa marahas na pamamaraan nila ng paniningil, may mga biktimang nabalitang nag-suicide at marami na rin umano ang nakararanas ng death threats,” ani Gatchalian, ang vice chairperson ng Senate Committee on Banks, Financial Institutions and Currencies.

Payo niya sa mga nangangailangan ng pera na kilatisin ng husto ang mga nag-aalok ng pautang lalo na kung kaduda-duda ang pag-aalok nila ng pautang.

Ibinahagi ni Gatchalian na patuloy siyang nakakatanggap ng mga reklamo ukol sa dinaranas na pananakot at panghihiya ng mga inutangan nilang kompaniya.