Pag-veto ni PRRD sa SIM card registration bill, nirerespeto ni Bong Go

INIHAYAG ni Senator Christopher “Bong” Go na iginagalang niya ang mga dahilan ni Pangulong Rodrigo Duterte sa pag-veto sa panukalang Subscriber Identity Module (SIM) Card Registration Act.

Ayon kay Go, pabor siya na muling suriin ang panukala upang matiyak na walang probisyon na labag sa Konstitusyon at kontra sa karapatan ng mamamayang Pilipino.

“Marahil po ay mayroong dahilan ang ating Executive. Usually naman po, ‘pag merong bini-veto ang executive, (may comments) naman iyan ng different agencies,” ani Go matapos niyang personal na asistehan ang mga nasunugan sa Barangay Baesa, Quezon City.

“Tinitingnan nila yung legality — kung wala bang magiging Constitutional issues tungkol dito, hindi ba babalikan ang gobyerno, bakit ipinasa ito at (dapat) pirmahan ni Pangulong Duterte, wala bang nilabag na batas na karapatang pantao itong batas na ito, at iba pa,” idinagdag niya.

Sa kabila ng pagiging co-author ng panukalang batas, nanindigan si Go na iginagalang niya ang desisyon ng Executive branch at nagpahayag ng pagpayag na gumawa ng mas masusing pag-aaral sa panukalang batas, lalo na ang mga probisyon na pinag-uusapan.

Layunin ng panukalang batas na iutos ang pagpaparehistro ng lahat ng SIM card at social media accounts sa bansa upang masugpo ang pandaraya at iba pang krimen na tinutulungan ng SIM card at labanan ang pagdami ng online trolls.

Binanggit ng Pangulo na ang pagsasama sa mga social media provider sa registration requirement ay hindi bahagi ng orihinal na bersyon ng panukalang batas.

“Nirerespeto ko pero kung ano ‘yung puwedeng pag-usapan at baka kung wala na pong panahon, (kailangan) i-refile po ito sa next Congress at tingnan nang mabuti, busisiing mabuti, himayin nang mabuti kung ano ang puwede at legal na maipasa para wala na pong magiging problema sa susunod na administrasyon,” ayon sa senador.

Nagpahayag si Duterte ng pagkabahala sa isang pinagtatalunang probisyon na maaaring magresulta sa isang sitwasyon ng mapanganib na panghihimasok ng estado at pagbabantay na nagbabanta sa maraming karapatan na protektado ng Konstitusyon.

Sinabi ni Go na pagdating sa pagpasa ng mga batas, patuloy na pagbubutihin ng mga sangay ng ehekutibo at lehislatura ang kanilang pagtutulungan at konsultasyon.

“Usually naman kapag may pinapasang batas, kinokonsulta sa Executive iyan para hindi masayang, pinaghirapan natin itong lahat,” ani Go.

“Sabi ko nga sayang. Sayang po yung batas, isa rin po ako sa nag-author nito,” anang mambabatas.