Pagtuturok ng 2nd Covid-19 booster shot simula na sa Lunes

APRUBADO na ni Department of Health Secretary Francisco Duque III ang rollout ng second COVID-19 booster shot sa mga immunocompromised na edad 18 pataas sa Lunes, Abril 25.

Kabilang dito ang mga pasyente na may cancer, recipients ng organ transplants, HIV o aids patients at iba pa.

Ayon sa kalihim, kasalukuyan nang binubuo ang guidelines sa nabanggit na booster.

Kabilang naman sa mga brand ng COVID-19 vaccine na gagamitin bilang second booster dose ang AstraZeneca, Moderna, Pfizer, Sinopharm at Sinovac.

Sinabi pa ni Duque na sinusuri na ng health technology assessment council ang naturang bakuna para sa a1 priority group o healthcare workers maging ang mga senior citizen.

Matatandaang inaprubahan ng Food and Drug Administration (FDA) ang Emergency Use Authorization (EUA) para sa second booster shots para sa mga senior citizen, immunocompromised, at frontline health frontliners.