3 magsasaka minasaker, killer nag-suicide

Patay ang tatlong lalaki at isa ang sugatan sa pamamaril ng kainuman sa bayan ng Santa Marcela, Apayao noong Lunes.

Kinilala ang mga nasawi na sina Bong Badua Ramirez, 48; Ryan Santi Soriano, 39; at Edmar Turilla Aguinaldo, 30. Sugatan naman si Stephen Salvatiera, 33.

Sa imbestigasyon ng Santa Marcela Police, nag-iinuman ang mga biktima sa bahay ng isang kaibigan, kasama rin ang salarin na si Norvie Pachecho, 32.

Sa report, biglang naglabas ng baril si Pachecho at pinaputukan ang mga biktima.

“Parang normal na inuman lang, kasi birthday ‘yun. Wala man lang sagutan na nangyari o kaya’y awayan basta ganun na lang na tumayo at binaril ang mga kainuman niya,” sabi ng hepe ng na si Police Lieutenant Alvaro Secligen.

Tama ng bala sa ulo ang agarang ikinamatay nina Ramirez at Soriano.Sa ulat , nadala pa sa ospital si Aguinaldo na nagtamo rin ng tama ng bala sa ulo, pero idineklarang dead on arrival ng umasikasong doktor.

Patuloy na nagpapagaling sa ospital si Salvatiera na tinamaan sa balikat. Nakaligtas naman sa pamamaril ang dalawa pa nilang kainuman nang makapagtago.

Sa pagresponde ng mga pulis, dinatnan na umano nilang patay na rin si Pachecho.

“Pagkatapos na binaril ang mga kainuman niya, mga ilang segundo lang nagbaril din sa sarili kaya bumulagta rin siya kung saan niya binaril ang mga kainuman niya,” ani Secligen.

Hindi nakuha ng pulisya ang baril na ginamit sa insidente dahil agad umano itong kinuha ng ama ni Pachecho.

Sa follow-up operation, narekober ang Glock 17 mula sa ama ng salarin.

Hinuli ang ama ng salarin at sinampahan ng reklamong obstruction of justice at paglabag ng Comprehensive Firearms and Ammunition Law.