RUIZ, GANADONG MAGTRABAHO; AT IA DAPAT NA BAGUHIN

MAS madaragdagan pa ang mahuhuling ilegal na kargamento na papasok at palabas ng bansa na gamit ang pantalan ng Bureau of Customs (BoC).

Mas maraming tax cheats at evader ang kakasuhan pa ng BoC sa Department of Justice at sa Court of Tax Appeal, at mas marami pang operasyon ang inaasahang magreresulta sa pagkilala at pagkakaso sa mga tiwaling opisyal ng Customs na ngayon ay maingat na iniimbestigahan ng mga matatapat na tauhan ni Commissioner Yogi Filemon Ruiz.

Bunga rin ng mabibilis na pag-iimplementa ng bagong gabay at patakaran sa pagpoproseso ng mga dokumento para mailabas ang mga kargamento sa Aduana, at ang maingat na pagsusuri sa tunay na halaga at uri ng mga importasyon, nakikita na kaya muling malampasan o higitan ang taunang koleksyon ng kawanihan.

Puna ng ilang independiyenteng survey group, mas mahusay na at mas maayos ang pagpapatakbo sa BoC, sa ilalim ng magaling na liderato ni Ruiz.

Bunga ng pagbabago ng paningin ng madla sa BoC na binabansagang “the most corrupt government agency,” sinabi ni Ruiz na lalo nilang sinisikap na maibalik ang tiwala ng taumbayan sa ahensya.

Aminado ang komisyoner na “marami pang dapat na gawin, marami pang dapat na baguhin” at ang maraming papuri na natatamo ng BoC, aniya ay nagsisilbing inspirasyon nila sa Customs upang lalo pang pagandahin ang kanilang trabaho at matapat na pagtupad sa tungkulin.

“Mas ganado kaming magtrabaho ngayon,” sabi ni Ruiz, na nagsabing hindi bumibitaw ang mga tauhan niya sa pagbabantay sa mga bagong paraang naiisip ng mga mandaraya at ismagler upang “maisahan” ang gobyerno at makaiwas na magbayad ng tamang buwis.

Bukod sa reporma sa loob ng BoC, pinatitindi rin ni Ruiz ang koordinasyon sa mga aduana ng ibang bansa, upang bago pa pumasok sa bansa ang mga ilegal na kargamento, ito ay madaling matukoy at masabat.

Minamadali na rin, sabi ni Ruiz ang pagpapatupad ng mga bagong paraan at prosesong gamit ang mga modernong komunikasyon ng computer para sa minimithing 100 percent “total paperless transaction” at pagbabayad ng buwis sa hangaring maiwasan na ang tukso at pagtanggap ng suhol.

Upang lalo pang ganahan ang mga kawani, pagsusumikapan ni Ruiz na mataas ang sahod ng mga kawani sa BoC, bunga ng pananalig na kung mas mapalalaki ang nauuwing pera ng mga kawani ng ahensiya, mas liliit na ang tsansa na mahulog sa bitag na sumama sa mga sindikato ng smagler at makisali sa paggawa ng katiwalian.

Upang mapaliit ang tsansa ng mga kontrabandista o ilegalista sa Customs, pinayuhan ni Ruiz ang mga ito na itigil na ang ilegal na gawain at sumama na sa maayos na pamamalakad na nais niya para maging pamana niya sa oras na matapos ang kanyang termino.
***
Paano nga ba nangyayari ang smuggling?

Ang malalaking sasakyang dagat ay nagagamit sa ismagling sa pamamagitan ng pagbabagsak ng ilegal na kargamento sa dagat na ang mga ito naman ay kinukuha ng maliliit na sa sea vessel at hindi na dumadaan sa mga pantalan ng Aduana.

Deretso ang mga ito — bigas, asukal, langis at iba pang produkto sa pamilihan.

Sa lawak ng pasigan ng bansa, tunay na mahihirapan ang BoC at maging ang Philippine Coast Guard at Philippine Navy na maikot at mabantayan ang mga lugar na madalas ay binabagsakan ng mga kontrabando.

Kung makarating naman sa mga pantalan at sa mga paliparan, magkakasabwatan ang mga opisyal at mga importer upang magpalusot ng ilegal nilang kargamento.

Isang paraan kung inyong natatandaan dear readers ay ang nangyaring diversion ng mga kargamento na nawala noon ang 2,100 containers na dapat ay nakarating sana sa Port of Batangas.

Nagmula ang mga kargamentong iyon sa Port of Manila at sa Manila International Container Port.

Kung paanong naglahong parang bula ang mga iyon, hanggang ngayon ay palaisipan pa rin sa BoC.

Nagagawa ring magpalusot sa mga duty-free ports tulad ng Subic at Clark at ang mga ito ay nadadala sa mga pamilihan sa malalaking siyudad sa Metro Manila ng mga magtitingi at naibebenta sa publiko.

Nagagawa rin ang ismagling sa paraang undervaluation o pagpapaliit ng dami at halaga ng importasyon, at nangyayari ito, muli bunga ng sabwatan ng mga bulok na kawani at opisyal ng BoC.

Sa halip na siraan at palayasin sa Customs na nais ng mga taong naapektuhan ng mga reporma ni Ruiz, ang kailangan ng kawanihan ay ang pagtitiwala sa kanilang masigasig na kampanya laban sa ismagling.

Hayaan si Ruiz at ng mga kasama na magampanan ang kanilang tungkulin at ‘wag patangay sa demolition job ng mga nais ang madambong sa Aduana.
***
Kinakailangan na marahil na i-restructure ang Intramuros Administration (IA) dahil hindi na ito nakatutugon sa tungkulin at gawaing na dahilan ng pagkalikha rito.

Opo dear readers, hindi nagagawa ng pamunuan ng IA ang tungkulin nito na payamanin at pangalagaan ang mga istruktura at destinasyon ng turismo sa Maynila.

Kailangan na po Pangulong Ferdinand ‘Bongbong’ Marcos, Jr. na gawing ex-officio chairman ng IA ang Alkalde ng Maynila.

Itinatag ang IA noong 1979 sa bisa ng Presidential Decree 1616 ni dating President Ferdinand Marcos, Sr.

Sa umiiral na istraktura ngayon, the mayor of Manila sits merely as a member of the board.

E grabe na po PBBM, nabubulok na at ang dumi ng Intramuros.

Panahon na po PBBM, na baguhin at ayusin ang Intramuros upang mailigtas ito sa tiyak na kahihiyan, and wost po ay kamatayan.

Save Intramuros, ngayon na!
***
Para sa inyong mga suhestyon, reaksyon at opinyon ay mag-email lang sa bampurisima@yahoo.com.