Deadline ng CHED sa PLM, tapos na!

NATAPOS na ang deadline na binigay ng Commission on Higher Education (CHED) sa Pamantasan ng Lungsod ng Maynila (PLM) na mag-comply sa requirement na kung saan ang Presidente nito ay dapat na doctorate degree upang makakuha ng Institutional Recognition (IR) at makapag- avail ng government subsidy na nagkakahalaga ng P350M. Ang kasalukuyang pangulo nito ay si Emmanuel Leyco.

Ang resolution 285-2023 na nabuo sa 603rd regular commission en banc meeting noong May 30, 2023, ay nagsasaad na bago ang implementation ng Universal Access to Quality Tertiary Education Act of 2017, ang PLM ay nai-kategorya bilang isang local universities and colleges (LUCs) na eligible na makapag-avail ng benepisyo ng Free Higher Education component ng UAQTE.

Sinasaad sa resolution na hindi exempted ang PLM mula sa determinasyon ng CHED para sa quality tertiary institutions na magiging beneficiaries ng nasabing program at noong June 2018, lahat ng LUCs na kabilang sa programa ay kailangang mag-comply sa parehong IR at 100 percent certificate of program compliance sa loob ng dalawang taon upang magtuloy-tuloy ang benepisyo.

Sinasabi pa na isa sa mga requirements upang makuha ang IR, ang Presidente ay dapat na may doctorate degree at ang LUCs na mabibigong mag-comply na magkaroon ng doctorate degree requirement para sa President ay tatangalin sa listahan at kukumpirmahin ng UniFAST governing board sa September 2022 board meeting.

“Based on the records of CHED -NCR, the current President of PLM has no earned doctorate degree, which is a requirement under existing CHED rules and regulations in order for an LUC to be granted Institutional Recognition,” ayon pa sa resolution.

Niresolba din na: “upon discussion and agreement… the Commission … directs PLM to comply within 15 days from receipt of this decision, with sanction that it will be recommended to the UniFAST Governing Board for delistment from the list of beneficiaries…” Ang resolusyon ay nabuo noong May 30, 2023, at nilagdaan ni CHED chair Prospero De Vera III at mga Commissioners na sina Ronald Adamat, Aldrin Darilag, Marita Canapi at Jo Libre at ang kopya ay natanggap ng PLM noong August 15, 2023.

Matatandaan na dalawang beses nang in-invalidate ng Civil Service Commission ang appointment ni Leyco dahil sa kabiguan nito na ma-meet ang education requirement para sa posisyon bilang PLM president.

Ang inihaing petisyon ni Leyco ay binasura din at nilagdaan ni CSC chairperson Alicia dela Rosa-Bala at CSC Commissioner Atty. Aileen Lourdes Lizada.

Pinatunayan din nito ang letter-decision na inilabas noong February 13, 2020 ng CSC-National Capital Region (NCR) na nag-i-invalidate sa appointment ni Leyco dahil sa hindi niya na- meet ang education requirement para sa nasabing position.

Sa desisyon noong February 13, 2020, in-invalidate ng CSC-NCR ang appointment ni Leyco dahil sa hindi nito na-meet ang educational requirement para sa nasabing posisyon na doctorate degree. Naghain ng petisyon si Leyco na i-review ang desisyon pero binasura ang kanyang petisyon ng CSC.

Sa desisyon nito, in-apply CSC ang Qualification Standards (QS) na sinasaad sa ilalim ng 1997 Revised Qualification Standards Manual, at dito ay sinasaad ang mga qualifications required para sa isang state university president at ito ay: kaukulang doctoral degree at limang taong karanasan sa posisyon involving management at supervision. Parehong hindi ito na-meet ni Leyco.

Kinategorya ng CHED ang PLM bilang local university at dahil dito ay sakop ito ng nasabing standards. Maliban pa sa pagkakaroon ng doctorate degree (Ph.D.) o Ed.D. (Doctor of Education), ang nasabing posisyon ay nire-require din ang “administrative and academic experience” o karanasan bilang dean, vice president o chancellor ng university.

Isa pang requirement ay “proven track record” bilang administrator ng college o university. Dapat ay dati din siyang President, Vice-President, Dean, Campus Administrator o Academic Director na direktang nagre-report sa President o Vice President ng institusyon kung saan siya naglilingkod. (ANDI GARCIA)