3 arestado sa SIM cards selling

TATLONG indibidwal ang inaresto ng National Bureau of Investigation (NBI) sa pagbebenta ng registered SIM cards sa Pasay City

Ayon sa ahensya, inaresto ng NBI Cybercrime Division (NBI-CCD) sina Beverly Cruz, Keone Lebumfacil at Aljon Reyes sa magkahiwalay na operasyon .

Nag-ugat ang operasyon mula sa impormasyon na ilang indibidwal ang nagbebenta ng registered SIM cards sa Facebook , na ginagamit naman umano sa masamang layunin.

Isang account na may pangalang ‘Nopce Naldz’ ang nagkomento sa FB group na siya ay nagbebenta ng 1,000 piraso ng SIM cards.

Dito na nakipagkasundo ang poseur buyer sa nabanggit na account name na magkita sa isang convenience store sa Pasay.

Sa nasabing lokasyon, tatlong cards– isang rehistrado at dalawang unregistered ang ibinigay sa poseur buyer para sa beripikasyon. Pagkatanggap ng bayad, inaresto si Cruz ng NBI-CCD.

Isa pang FB account na may pangalang “Armando Samling” ang nag-post na nagsasabing mayroong siyang libu-libong ‘SIM cards for sale’

Tumangging makipagkita ang poseur buyer kay Samling at sa halip sinabing delivery rider ang magpi-pick up nito.

Nakipagkita ang poseur delivery rider kay Lebumfacil at Reyes na nagbigay ng SIM cards sa kanya.

Matapos tanggapin ang bayad, inaresto sila.

Ayon sa NBI, kabuuang 1,023 SIM cards na ang kanilang nakumpiska. (Jocelyn Domenden)