Most wanted person, timbog sa Valenzuela

Kulong ang isang wanted sa kasong statutory rape nang madakip ng Valenzuela PNP sa isinagawang manhunt operation sa Valenzuela City, Sabado ng gabi.

Kinilala ni Valenzuela police chief P/Col. Salvador Destura Jr., ang naaresto na si alyas “Bryan”, 24 ng Brgy. Parada ng lungsod.

Sa ulat kay Northern Police District (NPD) Director P/BGen. Rizalito Gapas, nagsagawa ng joint intensified manhunt operation kontra wanted persons ang pinagsanib puwersa na mga tauhan ng Warrant and Subpoena Section (WSS) sa pangunguna ni P/Lt. Ronald Bautista at Northern NCR Maritime Police Station.

Nadakip ang akusado, 6:30 ng gabi sa kahabaan ng Alicia Street, Fortune 4, Barangay Parada sa bisa warrant of arrest na inisyu ni Valenzuela City Family Court, Branch 16 Presiding Judge Mateo B Altarejos nitong January 12, 2024, para sa kasong Statutory Rape .

Pansamantalang nakadetine sa custodial facility unit Valenzuela police ang akusado habang hinihintay ang paglalabas ng commitment order ng korte para sa paglilipat sa kanya sa Valenzuela City Jail.(Beth Samson)