Kasambahay tatakas sa amo, nahulog sa bubong

NASAWI ang 36-anyos na babaeng kasambahay nang mahulog sa bubong ng warehouse habang patakas sa kanyang amo sa Lucena City, Quezon noong Sabado.

Kinilala ang biktima sa alyas “Marites”, 36 anyos, residente ng Sitio Abukaduhan, Barangay Munting Parang, Tagkawayan, Quezon.

Ayon sa report ng Lucena Police, nais na ng biktima na umalis sa kanyang pinaglilingkurang pamilya na may-ari ng Lucena Mabuhay Lumber & Hardware pero sa hindi matukoy na dahilan ay mas ginusto pa nitong tumakas kaysa magpaalam sa mga amo.

Para makalabas ang biktima, umakyat ito sa ikalimang palapag ng bahay na katabi ng warehouse at mula sa terrace ng bahay naglakad ito sa bubong ng warehouse na matatagpuan sa Barangay Dupay, Lucena City.

Gayunman, napatapak ito sa fiberglass at transparent na bubong na biglang bumigay.

Nahulog ang biktima mula sa 18 metrong taas ng bubong, bumagsak sa semetadong flooring sa loob ng warehouse.

Dead on the spot ang biktima.

Patuloy pa ang imbestigasyon ng pulisya sa insidente.(Koi Laura)