Bahay ng city councilor sa Taguig, nilamon ng apoy

Tinamaan ng apoy ang bahay ng isang city councilor sa Brgy. Western Bicutan sa Taguig City noong Lunes.

Ayon sa Taguig City Fire Station, nagsimula ang sunog ng 10:12 ng gabi mula sa bahay na pag-aari ni Taguig District 2 Councilor Nicky Supan sa Sampaloc Street sa barangay.

Nakontrol naman ang sunog ng 10:39 ng gabi.

Nagsimula umano ang apoy sa isang dressing room sa ikatlong palapag ng limang palapag na bahay at napinsala ang nasa P80,000 na halaga ng mga ari-arian.

May kabuuang 25 na fire truck at dalawang ambulansya ang rumesponde sa nasabing insidente.