Pagpatay para sa katahimikan: Ang plano nina Garma at Leonardo na itago ang korapsyon sa PCSO

ANG mga testimonya nina Police Lieutenant Colonel Santie Mendoza at dating Korporal Nelson Mariano sa ika-7 pagdinig ng House Quad Committee ay nagbunyag ng nakakabahalang takot, korapsyon, at terror na nagpatuloy sa administrasyon ni dating Pangulo Rody Duterte. Tumestigo sila na sina retiradong hepe ng pulis na si Royina Garma at pambansang komisyoner ng pulisya na si Edilberto Leonardo ang nagplano ng pagpatay kay retired Police General at dating PCSO board secretary na si Atty. Wesley Barayuga noong 2020.

Ayon sa kanilang mga salaysay, sina Garma at Leonardo, mga upperclassmen ni Mendoza sa PNP Academy, ang nag-utos sa kanila na humanap ng mamamatay-tao upang patayin si Barayuga.

Pinaniwala sila na kasali sila sa isang lehitimong anti-drug na operasyon, at pinaniwala nina Leonardo at Garma na si Barayuga ay may kaugnayan sa iligal na operasyon ng droga. Ngunit ang katotohanan ay mas kasuklam-suklam.

Ayon kay Cong. Pimentel, si Barayuga ay handa na sanang isiwalat ang korapsyon sa loob ng PCSO, na nagdadawit sa mga makapangyarihang indibidwal, kabilang si Garma na noon ay nagsisilbing General Manager ng PCSO.

Handa na si Barayuga na tumestigo at ilahad ang katiwalian, ngunit siya ay pinatahimik bago paman mailantad ang katotohanan.

Ang emosyonal na pahayag ni Mendoza sa pagbubukas ng pagdinig ay naglalahad ng takot at presyur na dinanas niya. Binanggit niya ang mga banta mula sa mga matataas na opisyal na nagpumilit na pirmahan niya ang isang pekeng affidavit na nagdadawit sa ibang retiradong opisyal. Kitang-kita ang kanyang panghihinayang – inamin niya ang matinding pagsisisi sa paglahok sa pagpatay sa isang inosenteng tao. Maging siya ay nalito mula sa simula – bakit nga ba tinarget ang isang board secretary ng PCSO sa isang anti-drug operation? Mismong si Garma ang may lakas ng loob na sabihing mabuting tao si Barayuga, isang kasamahan na hindi niya mawari kung bakit gustong saktan ng sinuman. Isang malaking pagkukunwari – siya ang nagplano ng lahat.

Nang tanungin ni Cong. Luistro, diretsahan nang sinabi ni Mendoza ang mga dahilan kung bakit wala silang magawa kundi sundin ang mga utos. Hindi naman ito kalabuan – ngunit ito’y dahil ang mga utos ay nanggaling sa mga taong malapit kay Duterte. Ang pagsuway ay nangangahulugan ng panganib, hindi lang sa kanyang buhay, kundi pati narin sa kanyang pamilya. Sinabi niya na hindi na ito sikreto sa loob ng police force. Ang mga pangalan nina Leonardo at Garma ay kasingkahulugan ng Duterte, at kapag sila ay nagbigay ng utos, ang pagtutol ay maaring magdulot ng kamatayan.

Lahat ay nagiging malinaw, hindi ba? Bakit si Garma, isang dating opisyal ng pulisya na may sampung taon pang natitira sa kanyang karera sa law enforcement, biglang nagbitiw upang maging General Manager ng PCSO na noon ay balot na sa mga iskandalo ng korapsyon. Hindi lamang ito tungkol sa pag-angat ng karera. Malinaw na ngayon na pinagkakatiwalaan ni Duterte si Garma (marahil labis pa nga na ginawang kasintahan ni Duterte si Garma) – hindi lamang sa kanyang mga extrajudicial killings, kundi pati narin sa kanyang mga corrupt na gawain sa loob ng PCSO. Alam niyang gagawin ni Garma ang lahat para protektahan ang mga interes na iyon, kahit pa ang pagpatay sa mga whistleblower tulad ni Barayuga. At iyon nga ang ginawa niya.

Nakakatakot kung gaano kadaling patayin ang isang buhay sa utos ng mga makapangyarihang tao, nang walang alinlangan o tanong. Ang pagpatay kay Barayuga ay paalala kung gaano kalalim ang korapsyon na namayani sa panahon ni Duterte. Apat na putok ng baril, isang peke na kwento, at ilang salita lamang ang kinailangan upang wakasan ang isang buhay – at ibaon ang katotohanan.

Ganito namuno si Duterte at ang kanyang mga kasamahan – sa pamamagitan ng takot at terror. Ang imahe ng “strongman” na dating naging kaakit-akit sa marami sa kanyang kampanya sa pagkapangulo ay naging lisensya para pumatay, gamit ang digmaan kontra droga bilang pantabing upang patahimikin ang oposisyon. Ang pinakamasaklap? Hindi mahalaga kung ang mga biktima ay totoong sangkot sa droga o hindi – ang kanilang kapalaran ay itinakda ng mga nasa kapangyarihan.

Subaybayan!