SUSPEK SA PAGKAMATAY NG VIRAL NA ONLINE SELLER, NA-TIKLO!

MANDALUYONG CITY — Nakuha na ng mga awtoridad ang pangunahing suspek sa kasong Robbery with Homicide na ikinamatay ng 23-anyos na online seller na kumalat sa social media.

Isinagawa ang pagdakip sa pamamagitan ng pinagsamang puwersa ng Mandaluyong CPS sa ilalim ng Eastern Police District, kasama ang Regional Intelligence Division at iba pang espesyal na yunit ng pulisya.

Nangyari ang krimen Nobyembre 1 sa Connecticut Street, Brgy., Wack-Wack, Mandaluyong — habang nagkita ang biktima at suspek para sa kanyang online na transaksyon

Ngunit sa halip na bayaran s’y inagaw ng suspek ang cellphone nito at tumakas sakay ng SUV.

Sinubukan ng biktimang habulin ang sasakyan sa pamamagitan ng pagkapit dito, ngunit nahulog siya at nagtamo ng malalang pinsala na naging sanhi ng kanyang pagkamatay sa ospital.

Agad na nagsagawa ang mga imbestigador ng masusing pagsusuri sa CCTV at pagtunton sa ruta ng sasakyan.

Sa tulong ng pakikipag-ugnayan sa ibang lugar, natukoy ang kinaroroonan ng suspek sa Quezon City. Noong Nobyembre 5, bandang 6:40 ng gabi, hinarang ng mga operatiba ang SUV at positibong kinilala ng isang saksi ang suspek — kaya’t nahuli siya nang walang gulo.

Ayon kay PBGen Roman C. Arugay, District Director ng EPD: “Ipinapakita ng operasyong ito ang aming paninindigan sa Borderless Policing ng NCRPO.
Saanman magtago ang mga nagkasala, hahabulin namin sila para sa hustisya ng biktima at kanyang pamilya.”

Kasalukuyang nasa kustodiya ng Mandaluyong CPS ang suspek habang inihahanda ang mga ebidensya at dokumento para sa pagsasampa ng kasong Robbery with Homicide sa City Prosecutor. (Edwin Moreno)