WALANG LARONG POLITIKA

Naliligalig ang kampo ng mangmang ng kaTimugan habang lumalapit ang pagbubukas ng kongreso na naglalatag ng panuntunan sa gagawing pagpapasipa sa abalang pangulo sa salang pandarambong ng salapi ng bayan. Nagkalat ang mga panayam sa mga nanalong senador na kinakausap kuno ng mga nag-aambisyon sa panguluhan ng bugok na kapulungan na tila inisantabi sa usapin ang paglalatag ng panuntunan sa gagawing pagpapasipa kay Bloodbath (BB) Inday. Malaking salapi ang ginamit na tumatabon sa tunay na usapin na pagpapasipa o ilayo ang usapin sa mata ng bayan. Hindi nauumid ang mga ulat sa walang saysay na pag-iikot kuno ng mga ibig maging pangulo ng senado na kinakausap ang mga bagong senador na suportahan ang pwestong ibig. Sa mga ulat na girian ng mga nagbabalak na maging pangulo ng senado, sumasayaw sa saliw ng awit ang grupo ng mangmang ng kaTimugan sa paghahasik ng balitang upaw upang malayo ang usapin na nasa kanilang harapan.

Sari-sari o iba’t ibang salang balita ang inilalabas ng kaTimugan upang hikayatin ang pamahalaan na magbago ng tindig sa mga usapin, maging sa tinurang pagbabati na ibig ng pamahalaan. Silip na ibig pahinain ang tindig ng pamahalaan at kabila ang ibig ipakita sa Pinoy na paglakas kuno ng suporta ‘di lang sa pagpapauwi kay Totoy Oblo maging sa nalalapit na pagpapasipa kay BB Inday. Ang mapabalik si Totoy Oblo at ang mapatigil ang pagpapasipa kay BB Inday ang sigaw na walang patid na sinasabayan ng mga panayam sa mga tatayong hukom. Ang patas na pagdinig ang maririnig ngunit higit na malakas ang tinig kung magkano ang halaga ng maiaabot sa mga tatayong hukom ng senado. Pataas ang tawaran sa mga hukom at ang kagalingan na haharapin sa susunod na halalan ang itinataya sa pagpapawalang sala kay BB Inday.

Palamuti ang tingin ng kaTimugan sa alok na pagbabati ni Boy Pektus ng Malacanan kung walang kasiguruhan ng pagbasura sa haharaping pagpapasipa. Ang paglabas ng kautusan ng pagbabalasa sa gabinete’y isa sa mga pagtatakip ng kahinaan ng panguluhan na nagbigay lakas loob sa kaTimugan na mag usal ng maanghang na mga pahayag. At sa totoo lang, ang lumabas na resulta sa halalan sa Senado ang sangkalan ng kaTimugan na ‘di masipa si BB Inday. Sa panalong nakamtan ng mga kaalyado kuno sa Senado naging matabil at dumalas ang patutsada ng kaTimugan na handang humarap o harapin kuno ang sakdal na nakahain sa senado. O’ sadyang handa ang puhunan na gagamitin upang mabili ang mga tatayong hukom upang mailigtas si Mary Grace Piattos. Walang matigas na hukom sa mainit na salapi higit malaki ang gastos sa nakaraang halalan at sa darating na ‘28.

Sa magaganap na pagpapasipa kay BB Inday, hindi matatawaran na lalabas ang maraming salaping naipon sa tatlong taon na panunungkulan ng abalang pangulo. Hindi barya ang halagang na ipon at itatapon upang mapanatili sa pwestong tangan higit ang nakasalang sa darating na panahon. Hindi magbibitiw ng maanghang na salita si BB Inday kundi napipisil na may sapat na bilang na pagpapawalang sala. Bukod ang tulong na magmumula sa kaalyadong grupo mula sa bansa ni Onse na masisiguro na mapasa kanila ang usapin ng karagatan sa WPS sa darating na panahon. Ang masakit, katiting ang ambag ng bansa ni Onse sa pagpapawalang sala kay BB Inday subalit ‘di kasing halaga sa mawawalang yaman ng bansa sa oras na makabalik ang kaTimugan sa pambansang liderato. Dama ni Mang Juan ang hungkag na kaisipan ng kaTimugan subalit ang pagtataksil sa bayan ang kagalingan na ‘di matatawaran. Sa mga kinatawan, ang laban ng bayan sa hinaharap ang usapin sa pagpapasipa kay BB Inday.

Ang usapin na nasa harap ng senado’y usapin ng bawat Pinoy na naghahanap ng katarungan sa salang paglustay ng salapi ng bayan. Walang personal na galit si Mang Juan kay BB Inday ang hinihingi’y ang panagutin sa salang paglapastangan sa salaping bayan na ‘di napakinabangan mabuti’t na batid ang salang pandarambong. Dugo at pawis ng bawat Pinoy na nag-aambag sa kabang bayan ang ‘di pinahalagahan ng isang halal ng bayan. Hindi hinahanapan ng mali si BB Inday ngunit ang sirain ang tiwala ng bayan para sa kapritso ng katawan ang ‘di tanggap at galit pa ng mabatid. Ang salang galaw ang panagutan dahil sagrado ang pasya ng bayan ng (si BB Inday) ika’y iniluklok at pinagkakatiwalaan. O’ sa Smartmagic ang utang na loob.