ULAT NG KAPALPAKAN
Advertisers
Hungkag ang dating kay Mang Juan ang ulat sa bayan ni Jun Singhot sa katuwirang ‘di nadama ang paglago ng kabuhayan. Walang paglagong naganap sa buhay ng tao sa laylayan at higit na nadama ang pagkalam ng sikmura sa taas ng bilihin na nagpalayo sa kanilang hapag. Sa pakikinig sa mabulaklak na talumpati ‘di napunuan ng datos na nagdidiin sa nagawang pag-unlad kuno. O’ sadyang walang mailabas na datos sa dami ng viaje na nagpanganga sa bayan at mamamayan. Maganda ang pahayag hingil sa ekonomiya ng bansa ngunit aminadong ‘di tumaas ang kabuhayan ng mamamayan higit ang kabuhayan ng mga obrero na lunod sa baha ng dahil sa kataasan ng presyo ng bilihin. Ang masakit, walang banggit sa pagtaas ng sahod na sagot upang maibsan ang kabuhayan sa kamahalan ng mga bilihin. Sa talumpati, marami ang patama sa nakaraan sa kawalan ng gawa ngunit marami ang nawala, higit ang salaping bayan. At nagbabala na uusigin ang may sala ngunit ‘di ginawa sa dating kasama na madalas ang tigil sa ibang bansa.
Sa ulat, ‘di nadama ni Mang Juan ang banggit na kagalingan sa ekonomiya sa halip kahirapan ang dama sa balon na pinagkakitaan ng iilan. Ayon at itinutulak na panagutin ang mga may salang opisyal sa gobyerno higit ang lumustay sa pondo ng bayan para sa proyektong imahinasyon ngunit naubos ang perang inilaan para sa kagalingan ng bayan. Mainam na panagutin ang mga opisyal ng nakaraang pamahalaan at umaasa na makakasama ang mga natalagang opisyal ng sariling pamahalaan na nagpabaya sa tungkulin. Ang tatlong taon na ‘di inalam ang katayuan ng mga proyektong pinondohan ng bayan sa nakaraan ang salang galaw na ‘di sinilip ng kasalukuyan. Sapat ang kagalingan ng mga opisyal ng pamahalaan ngunit batid ang ugaling walang kusang palo higit kung alang kita sa galaw na gagawin. Jun Singhot, isama ang mga opisyal sa iyong termino sa pag-uusisa na nagpabaya sa tungkulin.
Sa totoo lang, malayo ang husay ng kasalukuyan sa nakaraan ngunit ‘di sapat na sabihing nagawa ang dapat sa pananahimik sa panlulustay ng ilan ng salaping bayan. Silip ang salang paggamit ng salapi ng bayan na nagsilang kay Mary Grace Piattos na ‘di pinansin ni Jun Singhot na nagbigay lakas loob kay Inday Gala. Mabait sa kung mabait si Jun Singhot ngunit usapin ng bayan ang nasa harap na sinumpaan na paglilingkuran ang bayan sino man ang masagasaan, panagutin ang may sala. Ang pinahabang usapin laban sa abalang pangulo na tila masisilid sa banga ang ‘di nahagip sa ulat sa bayan. O’walang balakin si Jun Singhot para sa kagalingan pansarili para sa susunod na panahon. At ang galaw na nagpapataas sa kumpiyansya ng mga tiwali o’ sadyang pareho ang balahibo ng hahabulin at ng hahabol?
Sa ulat ng habulan at pananagutin, tila may balakid ang tatahakin sa pagdami na nadagdag na ngalan na nagsiksik ng mga bilyones na pondo sa GAA? Huwag ialis sa diwa ang mga may salang opisyal na sarili ang inuna. Tanong, mapapaharap ba ng mga tao ni Jun Singhot ang nagsiksik ng bilyones sa GAA o unang haharap ang itatalagang Ombudsman sa mga kawatang este kinatawang bayan na silip sa pagsiksik ng P142.7B sa GAA. Ang ‘di pagbanggit sa usapin ng pagpapanagot sa mga opisyal sa kasalukuyan at pagtuon sa nakaraan ang palpak na ulat. Ang panagutin ang noon at ngayon na umabuso sa kabang bayan ang tamang galawan na ikakasiya ni Mang Juan. Ang mapanagot ang mga opisyal na banggit sa nawawalang salapi na sana’y magagamit sa programang tuwirang may pakinabang ang bayan ang habol at ang ibig ni Mang Juan.
Sa totoo lang, mabulaklak ang ulat sa bayan ni Jun Singhot ngunit hungkag sa datos na tatak na ‘di naalis. Sa haba ng ulat, walang banggit hinggil sa 1% binabang taripa sa mga iniluluwas na produkto ng bansa tungo sa Estados Unidos at ang 0 taripang sa mga pumapasok na produkto sa bansa mula ng banggit na bansa. Masaklap banggitin na ‘di ganap ang pakinabang ng bansa sa pagbisita at pag-uusap ni Jun Singhot at pangulo ng EU. At tila nakaungos si Trump sa usapan sa pag-ayon na magkaroon ng presensiya ng mga sundalong kano sa bansa. Abangan ang susunod na kabanata.
Sa tahakin sa hinaharap, nasisilip na magpapatuloy ang nagaganap sa kasalukuyan at ‘di nabanggit, ang pagiging lider ng mayorya ng anak ni Jun Singhot sa malawak na kapulungan. Malinaw ang tahakin sa mga darating na panahon, ang mapanatili sa mata ni Mang Juan na pagbaba sa tungkulin ni Jun Singhot sa pwesto ‘di mawawala ang ngalan at masisiguro na makikita ang galing ng batang kapangalan sa susunod na mga panahon. Higit kung papalarin ang mamanuking pinsan na taga pagsalita ng malawak na kapulungan.
Marami ang nagalak sa ulat sa bayan ni Jun Singhot ngunit silip ang kakulangan sa laman ng ‘di bigyan diin ng mga numero ang banggit na nagawa at panagutin ang may salang hinainan ng impeachment. Huwag alisin sa diwa Jun Singhot, na tila bula ang paghahanda sa kinabukasan kung ‘di masisipa sa pwesto ang nanay ni Mary Grace Piattos. Hindi kaila ang pagiging mapaghiganti ni Inday Gala sa sino mang kina-iinisan, at itanim sa isip at huwag ipagwalang bahala sa panahon na ika’y nasa baba at si Inday Gala ang nasa taas. Galawan ng may kabilisan ang pagpapanagot sa mga may sala sa bayan, higit ang mga ganid at magkakabalahibong mandarambong sa salaping bayan.
Muli, hungkag ang ulat sa bayan sa kawalan ng mga datos na magdidiin sa nagawa sa tatlong taon at gagawin sa susunod. Ang ‘di matikmang mababang halaga ng bilihin at ang ‘di tumataas na sahod, at ang mapalakas ang “purchasing power” ni Mang Juan ang tunay na kalagayan ng bayan. Subalit, ang matiyak na mapapanagot ang mga may sala sa paglustay ng salaping bayan, mula sa nagsiksik ng pondo sa GAA at ang nanay ni Mary Grace Piattos ang kilos o galaw na magsasalba sa ngalan na dala ng punong tagapagpaganap.
Maraming Salamat po!!!!