P11M ipinamahagi ni Isko sa mga pasyente ng KAAGAPAY prog.

Ipinahayag ni Manila City Mayor Francisco “Isko” Moreno Domagoso nitong Biyernes, Pebrero 13, ang pamamahagi ng P11 milyon na tulong pinansyal para sa mga pasiyenteng saklaw ng KAAGAPAY Program ng pamahalaang lungsod, bilang suporta sa mga residente na may malubhang kondisyon sa kalusugan.
Sa kanyang panayam na “Talk to the Patients,” tiniyak ni Domagoso na patuloy ang lungsod sa pagtulong sa mga pamilyang pinapasan ang gastusin sa ospital at iba pang kaugnay na medikal na pangangailangan.
Ipinunto ng Mayor na ang kakayahan ng lungsod na magbigay ng tulong ay bunga ng mas maayos na pamamahala sa pondo at ng patuloy na pagtitiwala ng mga mamamayan, na nagsisiguro na ang pondo ng bayan ay napupunta sa mga agarang serbisyong panlipunan.
“Gagawin natin ang lahat ng makakaya. Maraming salamat sa mga taxpayer. Sa tiwala nila, nakakaluwag-luwag tayo dun sa mga nangangailangan,” ani Domagoso.
Ayon sa Mayor, layunin ng tulong pinansyal na bawasan ang pasanin ng mga pamilyang dumaranas ng sakit, lalo na yaong mga kasalukuyang nagpapagaling at nakakaranas pa rin ng pinansyal at emosyonal na epekto ng mga medikal na emerhensiya.
Tiniyak din niya sa mga benepisyaryo na ipagpapatuloy ng lungsod ang pag-abot sa mas maraming residente na nangangailangan, kabilang ang mga pasyenteng nasa ospital at mga batang sumasailalim sa paggamot.
“Yung pera mawawala, kikitain ulit. Pero ‘yung buhay pag nawala… huwag naman sana,” dagdag ni Isko.
Ayon kay Domagoso, bagama’t maaaring mabawi ang mga pinansyal na pagkawala, ang buhay ay hindi mapapalitan, kaya hinihikayat ang mga pamilya na magpokus sa paggaling at pagbawi.
“Sana ang City Government ng Maynila at ang mga taxpayer ng lungsod ay nakatulong upang malutas ang inyong problema, o kahit mabawasan ito nang malaki. Maging payapa kayo. Ang nangyari sa inyo, pwedeng mangyari sa kahit sino,” pagtatapos ng Mayor.(BP)