“PAYOLA” AT “MAGARBONG” REPAIR SA MSU?

NAISULAT dito ang “hinagpis” ng mga estudyante sa ‘College of Medicine’ at ‘College of Agriculture’ sa Mindanao State University (MSU) na hindi pinayagan ni President Atty. Paisalin Pangandaman Tago na makadalo sila sa dalawang malaking pagtitipon—na ‘requirement’ pa naman sa kanilang mga kurso.

“Nagkadautang” umano ang mga estudyante at kanilang pamilya dahil sa kanselado nilang biyahe at ang umano’y “pangako” na ‘refund’ ni Tago ay walang katiyakan,

Naisulat din kasi natin na maraming ‘requirements’ bago pumayag ang COA na maibalik ang kanilang pera.

Ngayon naman, may isyu nang “pagpapaganda” sa kanyang opisina at ‘official residence’ na ayon pa sa mga miron, wala umanong ‘Program Of Works’ kaya hindi malinaw kung magkano ang nagastos mula sa pondo ng unibersidad.

‘Reimbursement-based approach’ daw ang ginawang sistema na ewan natin, COA Chairman Gamaliel Cordova, kung pinapayagan ng ‘government accounting and auditing manual?’ Meron bang ganyan?

May “alingasngas” din umano, Ombudsman Boying ‘Bossman’ Remulla, na may buwanang “tongpats” sa kontratang pinasok ng MSU sa isang pribadong ISP (Internet Service Provider) kaya mainam na “mabusisi” dahil alam natin na sa bago mong posisyon, hind imo papayagan na madungisan ang imahe ng buong gobyerno.

Dagdag pa ng mga miron ‘five figures’ ang pinag-uusapan dito kada buwan, wow!

Oops! Sa BARMM Transition Authority (BTA), Minister for Transportation and Communications si Tago at harinawang hindi ‘carryover’ sa kanyang dating posisyon ang bago umanong “kalakaran” sa MSU ICT.

At dapat din umanong “maalarma” ang Palasyo dahil sa nangyari umanong ‘renovation’ sa King Faisal Mosque’ sa loob ng Marawi Campus, “kinukuha” umano ni Tago ang kredito kahit ang gastos ay “donation” umano ng Malaysia?

Bagaman may ‘fixed term’ na ‘6-years’ ang MSU President, kahit mga ‘fixed term political appointees,’ ay puwede pa ring sibakin ‘for cause’ at ‘loss of confidence of the appointing authority,’ tama ba dear readers?

Hindi natin sinasabi na may “dahilan” ang Palasyo para alisin si Tago sa puwesto pero, sa dumaraming reklamo, ano kaya ang susunod na kabanata?

Muli, bukas ang ating pitak sa paliwanag ng MSU President.

Abangan!