PASAHERONG SEAMAN NAKALABOSO DAHIL SA “BOMB JOKE”

ISANG Pinoy seafarers ang inaresto ng mga awtoridad dahil sa pagbibiro na may dala siyang ‘bomba’ sa Ninoy Aquino International Airport (NAIA) Terminal 2 patungong Butuan City noong Martes, Mayo 26, 2026.

Nakilala ang pasahero na isang 26-taong-gulang na seafarer mula sa Taliyaan, Misamis Oriental, at nakatakdang maglakbay patungong Butuan City.

Sinabi ng PNP-Aviation Security Group (AVSEGROUP) na naganap ang insidente habang kausap ng pasahero ang isang miyembro ng cabin crew tungkol sa laman ng kanyang bag.

Sumagot umano ang pasahero na naglalaman ito ng isang “bomba,” at kalaunan ay sinabing biro lamang ito. Agad na iniulat ng cabin crew ang ‘pananakot’ ng pasahero dahilan upang tumawag sa mga awtoridad ng paliparan, na nag-udyok sa pagpapatupad ng mga karaniwang pamamaraan sa seguridad.

Agad na ipinadala ang AVSEGROUP, kasama ang mga yunit ng bomb disposal at K9, upang suriin ang mga bagahe ng pasahero at ang mga nakapalibot na lugar. Matapos ang inspeksyon, kinumpirma ng mga awtoridad na walang natagpuang pampasabog o mapanganib na materyales.

Dinakip ng pulisya ang marino dahil sa umano’y paglabag sa Presidential Decree No. 1727 o ang Anti-Bomb Joke Law. Ipinaalam sa kanya ang dahilan ng pag-aresto at ang kanyang mga karapatan, habang nananatili siya sa kustodiya ng mga awtoridad ng NAIA para sa wastong disposisyon. (JOJO SADIWA)