NAPALITAN DI’ PANANAGUTIN?

SAGAD sa bruhaha ang naganap sa Senado at sa huli bumaba ang bruha na masama ang loob sa ‘di matanggap na pagbaligtad ng kakampi sa takot na sumunod kay Sexy at Pogi sa piitan ng BJMP. Mahaba ang laban na naganap sa senado at natapos sa “split decision” kung saan kahit pinahirapan na may kahabaan, napagwagian at ganap na pangulo na ng bagong Senado, Win-na-Win. Sa likod ng ‘di matanggap na pagkatalo ng mga bruha, umaasang magpapatuloy sa pagiging matabil ang Kalderong walang laman upang ilabas sa bayan ang ‘di batid na kaganapan sa pamahalaan. Ang malaman ng bayan ang mga anomalyang nagaganap sa pamahalaan na ‘di ibig mabatid ang dapat kakalkalin ng grupo ng Kalderong walang laman sa kagalingan ng bayan. Umaasa na lalakipan ng mga patotoo ang kwitis na ‘di pumutok sa mga darating na pagdinig na magbabangon sa pangalan na nadungisan.

Sa pagbabago sa liderato ng Senado, umaasa na ‘di matatakpan ang mga katiwaliang nagaganap sa pamahalaan at higit na paiigtingin ang pagbabantay. Pagbabantay sa pang-aabuso sa lahat ng sangay ng gobyerno hinggil sa paggamit ng salaping bayan. Saligan ng katotohanan ang inaasahan na walang pinapaboran kung hindi ang kabutihan ng mamamayan. Umaasa na sa pagkakaroon ng bagong mayorya sa senado, hindi magaganap ang mga takipan sa salang gawa ng administrasyon na dahilan sa talunan o lundagan ng tindig sa dahilan na kagalingan para sa bayan. Maselan ang pagbaligtad ng tindig na para sa sarili ang pakinabang ngunit huwag alisin sa isip at puso ang higit na mahalagang dahilan – ang kapakanan ng bayan at mamamayan. Ang taong bayan ang naglagay sa puwestong tangan, ang tao ang paglingkuran, tamaan man ang tao sa Balite ng Malacanan.

Sa totoo lang, maraming naganap na palitan sa liderato sa kapulungan ng Senado maging sa malawak na kapulungan na ang layon ay itulak ang mga batas na ibig makatulong sa nakakarami. Sa tindig na banggit, nagkakaroon ng mga baklasan sa mga hanay na patungo sa palitan ng liderato. Ang marangal na tindig at para sa nakakarami ang dahilan ng ‘di pagkakasundo ng mga kinatawan higit kung walang padulas na pakinabang. Tunay na kagalingan ng bayan ang ibig ng mga kinatawan ngunit nagagapi ng pansariling layon higit sa pakinabang sa paglabas sa kasalukuyang larangan. O’ sadyang postura ang marangal na tindig at ang pagpapalit ang ganap gawi ng makuha ang dapat na salapi. Nagbabago ang marangal na tindig higit sa panahon na kailangan, sa halip na sumunod sa kasamang garapal ang pagkaganid.

Ang marangal na tindig ang inaasahan sa pagbabago ng liderato sa senado higit sa mga tumawid na nakakita ng liwanag para sa bayan. Ang magpakita ng kagalingan para sa pakinabang ng bayan ang inaasahan sa mga senador na pumakabila at naging bahagi ng nakakarami. Hindi umaasa na magiging tuta at sunud-sunuran sa kung sinong hudyo na una ang sarili higit sa paggamit ng salaping bayan na bumubulag sa dilat na kamalayan para sa sariling pakinabang. Ang inaasahan, tindig sa kagalingan ng taong bayan ang uunahin higit sa panahon na mulat ang mamamayan at may kadalian mabatid ang kaganapan. Ang mahusay na pagdadala sa banggit na kapulungan ang inaasahan sa lideratong dumaan sa mga pagsubok. Hindi yuyukod sa ano mang panggigipit at ‘di isusuko ang pakinabang ng nakakarami.

Muli, sa pagbabago sa liderato sa Senado umaasa na ‘di iisantabi ang mga usapin na unang nabunyag at higit na aalamin ang puno’t dulo ng mga anomalya. Sa pagpasok sa bagong mga liderato ng mga komite, umaasa na mababatid ang salarin na sangkot sa mga anomalya, mga ibinunyag ni Jun Singhot maging ang mga inilabas na mga bagong ngalan o impormasyon ng dating namumuno sa asul na komite. Umaasa na walang pagtatakip na magaganap sa mga ngalan na nabanggit at malilinis ang dapat linising ngalan. At sa huli, mapapanagot ang dapat managot maging bahagi ng nakakarami o iilan na kasapi ng kapulungan. Serbisyo sa bayan ang ititindig at ang lalandas sa karapat dapat patungo sa magandang lingkuran sa 2028. Sa totoo lang, wala pang napipisil na magiging pambato sa upuan na inaasam ng mga politikong mapanlinlang.

Sa kabilang banda, ‘di ibig tuldukan ang dalampu’t walong araw na nasayang ng bugok na kapulungan dahil sa pagpapalit sa liderato. Umaasa na babalikan ang mga kaganapan na walang pakinabang si Mang Juan higit sa P700M na sinayang sa loob ng banggit na araw. Napakalaking halaga ang itinapon ng lideratong walang nagawa para sa kabutihan ng bayan. Sa pagkakataong banggit, ‘di makatuwiran na largahan na lang ang nakaraan at sumulong para sa pagkakaisa. Bayan ang tumustos sa panahon na bangayan ang gawa at walang batas na nalikha at ‘di makatuwiran na walang mapanagot. Sa pagpasok sa banggit na bulwagan, sumumpa ang mga kinatawan na gagawin ang lahat para sa kagalingan ng bayan, panagutin ang may sala, higit sa salang panlulustay sa salaping bayan. Hindi ba uri ito ng panlulustay sa salapi ng bayan? Itanong kay Inday Salakay…

Ang nakamit na liderato’y ‘di daan upang makalimot sa mga naganap sa nakaraan higit silip ang ibig ng bayan na panagutin ang may sala sa kaguluhan. Hindi barya ang tinustos ni Mang Juan sa lideratong walang nalikhang batas sa halip pagkakahati hati ang naganap sa hanay ng mga kinatawan. Ang salang galawang ‘di inaasahan ang nagsasaad bigyan katarungan si Mang Juan sa nawalang salapi na tinustos ng Kalderong walang laman. Uulitin, katarungan kay Mang Juan sa pagtustos ng P700M sa loob ng 28 araw na banggit ni Kin. PiLac sino man ang tamaan. Hindi ibig na muling magkawatak watak ang kapulungan ng senado ngunit at paano naman si Mang Juan.

Hindi makatarungan na napalitan ngunit ‘di panagutin sa salang gawa habang ang tulad ni Mang Juan na patuloy na nangangalap ng makakain sa araw araw. Walang paglalayon na balikan at panagutin dahil sa ambisyon ngunit ang salang pagtustos salaping bayan ang ibig makakamit na katarungan nang ‘di maulit ang nakaraang sa kinabukasan. Payak ang ibig, panagutin ang napalitan nang ‘di tularan sa kinabukasan.

Maraming Salamat po!!!!