QCPD Oplan Bisita Eskwela, pinalawig pa para sa kaligtasan ng mag-aaral

Pinalawig pa ng Quezon City Police District (QCPD) ang pinaiiral na nitong programang “Oplan Bisita Eskuwela” para lalo pang matiyak ang ligtas at matiwasay na kapaligiran sa pag-aaral sa buong lungsod.
Ang hakbangin ng QCPD sa pamumuno ni Director, PBrig. Gen. Randy Glenn Silvio ay pagtalima sa mga direktiba ni Philippine National Police Chief, PGen. Jose Melencio Nartatez Jr., at ni PMGen. Anthony Aberin, National Police Regional Office Director.
Dinagdagan ng QCPD ang presensya ng mga pulis sa pamamagitan ng pagpapakalat ng mga tauhan sa mga pasukan ng paaralan sa oras ng pagdating at pag-uwi ng mga mag-aaral at guro. Nagsasagawa rin ng mga regular na patrol at roving security sa pagitan ng mga oras na ito upang matiyak ang patuloy na pagbabantay at mapigilan ang mga posibleng banta.
Bukod dito, isinasagawa rin ng QCPD ang mga kampanya sa impormasyon laban sa anti-bullying at paghahanda sa sakuna upang mapataas ang kamalayan at kahandaan ng mga mag-aaral, guro, at kawani ng paaralan.
Kaugnay nito, sa isang pagpupulong ng QC Local Government Unit (LGU) sa pamumuno ni Mayor Joy Belmonte nitong Hunyo 23, 2026, kasama ang QCPD, tinalakay dito ang mas pinalawig na pagpapatupad ng mga estratehiya para sa seguridad ng lungsod laban sa mga karahasang may kaugnayan sa paaralan.
Ang mga hakbang na ito, sa pakikipagtulungan sa Department of Education (DepEd), ay kinabibilangan ng mga safety drill, pagpapataas ng presensya ng pulisya, at mga engineering intervention upang mapabuti ang seguridad sa mga paaralan.
Hinihimok din ng QCPD ang aktibong pakikilahok ng mga magulang, guro, at mga pinuno ng mag-aaral sa mga inisyatiba sa kaligtasan.
Patuloy din ang isinasagawang pagsubaybay upang matiyak na ang lahat ng hakbang ay nagpoprotekta sa mga mag-aaral habang itinataguyod ang kanilang mga karapatan, pribasya, at pangkalahatang kapakanan. Sa oras ng emergency, pinapayuhan ang publiko na tumawag sa E911 o sa QC Helpline 122. (Almar Danguilan)