DTI hinimok na magsampa ng kaso laban sa Shopee, Lazada sa patuloy na pagbebenta ng di-rehistradong vapes

DALAWANG grupo ng mga konsyumer ang umapela sa Department of Trade and Industry (DTI) na magsampa ng administrative sanction o kaso sa korte laban sa e-commerce platforms na Shopee at Lazada dahil sa patuloy na pagbebenta ng mga ipinagbabawal na vapes na hindi sumusunod sa batas at nagbabayad ng buwis.

Nagpahayag ng matinding pagkabahala ang Consumer Choice Philippines (CCP) at ang Nicotine Consumers Union of the Philippines Inc. (NCUP) sa talamak na pagbebenta ng mga hindi rehistradong vaporized nicotine and non-nicotine products sa mga online marketplaces at inirekomenda ang pagsasampa ng kaukulang kasong laban sa kanila.

Sa magkahiwalay na liham kay Atty. Fhillip D. Sawali, Direktor ng Fair Trade Enforcement Bureau ng DTI noong Hunyo 21, 2023, sinabi ng CCP at NCUP na patuloy na lumalabag ang mga e-commerce platforms sa Republic Act No. 11900, o ang Vaporized Nicotine at Non-Nicotine Products Regulation Act.

Ayon kay CCP president Luis Gregorio B. De La Paz, umaasa ang kanyang grupo na tutuparin ng DTI na puprotektahan nito ang pampublikong interes at kapakanan ng mga konsyumer laban sa bawal na aktibidad at maghahain ng mga kaukulang kasong administratibo sa korte upang itigil na ang pagbebenta ng illicit vapes sa Internet.

Sinabi naman ng pangulo ng NCUP na si Antonio P. Israel na direktang sinabihan nila ang Lazada at Shopee noong Disyembre 16, 2022 at nagpadala ng liham sa DTI noong Pebrero 15, 2023 at Marso 23, 2023 ukol dito.

Ani Israel, hanggang ngayon ay hindi pa sila nakakatanggap ng anumang tugon mula sa Lazada at Shopee na hindi pa din inaalis ang mga ipinagbabawal na VNNPs sa kanilang mga online platforms.

Ang dalawang grupo ay nagpakita din ng ebidensya, sa pamamagitan ng mga screen shots ng mga bawal na vape sa dalawang online marketplaces, upang suportahan ang kanilang alegasyon.

Sinabi ng Israel na sinusubaybayan nila ang pagsunod ng mga e-commerce platforms at regular nilang sinusuri ang iba’t ibang mga sites upang matukoy ang pagsunod sa direktiba ng DTI.

“Gayunpaman, ang ilang mga listahan ng mga ipinagbabawal na VNNP ay nananatiling available at naa-access online,” sabi ni Israel. Ipinakita din niya ang isang listahan ng mga ipinagbabawal na VNNPs na naka-advertise at ibinebenta sa Lazada at Shopee noong Hunyo 13, 2023.

“Magalang naming inuulit na ang patuloy na paglabag sa mga platform ng e-commerce ay isang kapinsalaan sa gobyerno ng Pilipinas partikular sa Kongreso na maingat na pinag-isipan at pinagtibay ang VNNP Law at ang DTI na siyang pangunahing ahensya ng pamahalaan na inatasang mag-regulate ng vaporized nicotine at non-nicotine products,” sabi ni Israel.

Sinabi ni Israel na ang patuloy na pagsuway ng Shopee, Lazada at iba pang e-commerce platforms ay dapat na may kaukulang pananagutan.

Ayon sa Seksyon 8 ng VNNP Law, ang mga produktong ibinebenta at ina-advertise sa Internet ay dapat sumunod sa mga kinakailangang babala sa kalusugan na nakasaad dito, gayundin ang iba pang mga itinakda ng BIR kabilang ang tax stamp, minimum o floor price at iba pang piskal na marka.

“Batay sa aking karanasan sa pagbili ng mga produktong sa Lazada at Shopee, ang mga produktong natatanggap ko ay walang mga graphic warnings sa kalusugan sa kanilang packaging.Ang mga e-commerce platform na ito, kapag na-access sa pamamagitan ng website/browser, ay hindi rin nagtataglay ng mga signage (point-of-sale) na iniaatas ng VNNP Law kapag naghahanap ng mga produktong smoke-free o e-cigarette. Napansin din namin na ang mga produktong binanggit namin sa Annex A ay hindi rin kasama sa listahan ng mga rehistradong may tatak ng Bureau of Internal Revenue,” sabi ni Israel.

Nakasaad sa Section 23 ng VNNP Law na ang mga online platforms na hindi sumusunod sa batas ay dapat utusan ng DTI na agad na suspindihin ang pagbebenta ng mga naturang produkto at dapat managot sa mga multa at parusa, dagdag ni Israel.

Sinabi ni De La Paz na ang mga online marketplaces ay lumalabag din sa Sec. 83 ng VNPP law dahil ang ilan sa kanilang mga produkto ay walang mga graphic warnings kalusugan, hindi nakarehistro sa Bureau of Internal Revenue batay sa Revenue Memorandum Circular No. 57-2023 at walang signage na ipinag-uutos ng batas.

“Hindi nakakagulat na ang mga ipinagbabawal na VNNP ay laganap sa iba’t ibang mga online platform, lalo na sa Shopee at Lazada,” sabi ni De La Paz.

Sinabi ni De La Paz na tungkulin ng mga e-commerce platforms na magsagawa ng sapat na pamantayan sa know-your-client (KYC), at mahigpit na ipatupad ang mga nauugnay na batas at panuntunan at regulasyon, lalo na tungkol sa pagbebenta at pamamahagi ng mga produkto para sa proteksyon ng publiko.

“Ang gobyerno ng Pilipinas ay dumaranas din ng malaking pagkawala ng kita dahil sa paglaganap ng mga lumalabag na produkto. Sa pamamagitan ng pagsugpo sa pagbebenta ng mga direhistradong VNNP, matitiyak ng gobyerno na ang mga lehitimong negosyo ay sumusunod sa regulasyon, nag-aambag ng buwis at nagsusulong ng antas ng kalidad sa merkado,” aniya.

Nauna nang umapela ang Philippine Medical Association sa Senado at iba pang ahensya ng gobyerno na labanan ang mga hindi rehistradong sigarilyo at vapes sa online platforms. Sinabi ng PMA na ang mga produktong ito ay hindi sumusunod sa regulasyon, posibleng hindi nagbabayad ng buwis, at walang graphic warnings sa kalusugan, internal revenue stamp o packaging at iba pang kailangang label.