Total ban sa online sugal, ipinanawagan ng CBCP
Advertisers
Pinuri ng opisyal ng Catholic Bishops’ Conference of the Philippines (CBCP) ang hakbang ng Bangko Sentral ng Pilipinas na ihiwalay ang e-wallets mula sa online gambling sites sa loob ng 48 oras.
Ayon kay CBCP President Pablo Virgilio Cardinal David, bagama’t magandang simula ito ay hindi pa rin sapat ang simpleng regulasyon.
Kaugnay niyan, muli silang nanawagan ng total ban sa online sugal lalo’t malinaw naman aniya sa batas na bawal ang mga slot machine at pasugalan sa mga lugar na bukas sa publiko maliban sa mga accredited na hotel at resort.
Pero sa panahon daw ngayon, nasa cellphone na mismo ang sugal kung kaya’t kahit sino, kahit saan, bata man o matanda ay madaling maka-access, wala nang bantay at wala nang limitasyon.
Masyado na rin daw malaki ang epekto nito sa pamilya, sa kabataan, at sa mahihirap dahil ang mga ordinaryong tao ang nalulubog sa utang, adiksyon, at kawalan ng pag-asa kahit na bilyon-bilyon pa ang kita ng gobyerno mula rito.
Samantala umani rin ng papuri mula sa mga kongresista ang atas ng Bangko Sentral ng Pilipinas o BSP na i-unlink o putulin ng mga e-wallet provider ang kanilang koneksyon sa mga online gambling site.
Tiwala si Kamanggagawa Party-list Representative Elijah “Eli” San Fernando na ang hakbang ng BSP ay makapipigil sa mabilis na pagkalulong ng ating mga kababayan, lalo na ng kabataan, sa sugal na sumisira sa pamilya at kabuhayan.
Para naman kay FPJ Panday Bayanihan Party-list Rep. Brian Poe Llamanzares, ang aksyon ng BSP ay malaking tulong para maproteksyunan ang kabataan at iba pang sektor gayundin upang matiyak na ang sistema ng pananalapi sa bansa ay hindi magiging daan ng pagkalulong sa sugal.
Sabi naman ni La Union Rep. Francisco “Paolo” Ortega V, nakaaalarma na dahil sa link ng e-wallets sa gambling sites ay naging madali para sa lahat ang makapagsugal kahit nasa loob ng kanilang tahanan.
Nakalulungkot para kay Zambales Rep. Jefferson “Jay” Khonghun na ang madaling access sa pamamagitan ng mobile payments ay nagpalala sa pagka-adik sa sugal kung saan marami ang naubos ang pera, nasira ang pamilya, dumanas ng depresyon habang mayroon pang nagpatiwakal.
Tiwala naman si Manila Rep. Ernesto “Ernix” Dionisio Jr., na dahil sa deriktiba ng BSP ay magiging produktibo na ang paggamit sa mobile payment services.
Giit naman ni Lanao del Sur Rep. Zia Alonto Adiong, deserve ng mga Pilipino ang payment systems na nagtataguyod ng financial stability at hindi naghahatid sa mga delikadong aktibidad.
Nananawagan naman si Cagayan de Oro Rep. Lordan Suan sa mga kinauukulan na sumunod ng mahigpit sa atas ng BSP at tumulong sa pagpalakas ng consumer protections.
***
Para sa inyong mga suhestyon, reaksyon at opinyon mag-email lang sa balyador69@gmail.com.